Sentimento sa katawhan

Wala ko masayop sa akong pangagpas kaniadto nga dili gayud modagan alang sa unsa mang nasyonal nga posisyon si Presidente Rodrigo Duterte bisan pa man sa dakong pressure gikan sa iyang partido nga mokandidato.

Kaniadtong Sabado, gianunsiyo ni Duterte nga dili na siya modagan pagkabise presidente sa piniliay sa Mayo sa sunod tuig. Gani, midugang siya nga moretiro na lamang siya sa politika human sa iyang termino sa Malacañang.

Hinuon, nasurprisa kita sa dihang si Senador Bong Go ang mi-file og certificate of candidacy alang pagkabise presidente kaniadtong Sabado. Mismong si Duterte ang mikuyog kaniya ngadto sa buhatan sa Commission on Elections.

Insakto lamang ang desisyon ni Presidente Duterte pagsibog sa iyang plano nga magbise presidente ug mopahuway na gikan sa politika. Insakto na ang katuigan nga iyang gigahin sa labing taas nga posisyon sa nasud.

Basin baya kon manghimaraut kaniya ang katawhan kon mopursige gayud siya sa iyang plano pagdagan pagkabise presidente. Dili gayud malikayan nga alang kanila, ang maong lakang usa lamang ka hinakog nga pagkabyot sa gahum.

Hinuon, in fairness sa Presidente, iyang nakita ang sentimento sa kinabag-an sa katawhan nga dili pabor sa iyang plano nga magbise presidente. Mao nang, matud niya, dili na lamang kuno siya mopugos sa iyang plano.

Gani, sa survey sa Pulse Asia alang pagkabise presidente, si Senate President Tito Sotto maoy nag-una sa mga gustong botaran sa katawhan sa adlaw sa eleksiyon. Anaa lamang sa ikaduhang puwesto si Presidente Duterte.

So, ang maong survey nagpakita lamang nga alang sa katawhang Pilipinhon, insakto na ang unom ka tuig ni Presidente Duterte sa Malacañang. Ug angay lamang nga sundon kining maong sagrado nga sentimento sa kinabag-an.