Kasin atian sa Martial Law

Septiyembre 21, 1972, gipirmahan ni anhing Presidente Ferdinand E. Marcos ang dokumentp sa Martial Law. Pagka 23 sa samang bulan, gisugdan ang hugtanong pagpasunod niini.

Ang iyang tumong nindot: Aron ang dugoong kalayo sa kagubot mapalong ug dili mahipunta ang Pilipinas sa mga kamot sa komunistang grupo, kinsa hagbay rang nagtinguha nga maoy mohari sa atong nasod ug himoon nila kitang ilahang ulipon.

Apan wala kini makita-sabti sa inosenteng katawhan. Unsaon, may gamhanang nasud ug mga adunahang magpapatigayon sa Pilipinas, kinsa sa hilom, maoy misuporta ug mimaniobra aron tumbahon ang kalig-on sa administrasiyon ni Marcos, pinaagi sa pagpakatap og impormasiyong makapahugaw-tabon sa tinuorayng imahe niini.

Sama niadtong nahitabo sa Plaza Miranda bombing, Agosto 21, 1971, adlaw nga nagpahigayon og political rally ang taga Liberal Party (LP). Kini gibombahan sa mga teroristang komunista, pero ang gipasanginlan, si Marcos. Adunay namatikdan. Si kanhi Senador Benigno Aquino Jr, LP member, wala diha. Ngano kaha?

Katorse anyos pa ko, pagdeklarar sa Martial Law. Daghang gipriso ug gisilotan. May mga nahiagom sa kamatayon.

Apan sila pulos may bug-at nabuhat nga nakasupak sa balaod ubos sa Martial Law. Hinuon, kon magbinut-an ka lang, dili ka kuyawan. Kay ang maong balaod nagpalig-on sa baroganan ni Marcos nga: “Sa ikauunlad ng bayan, disiplina ang kailangan.”

Ako mismo, nakatilaw’g priso tungod sa curfew. Isip mananagat, didto mi modunggo sa Tuburan. Sanglit, adto mi magkatulganan sulod sa merkado, mihapit mig tindahan nga abli pa bisag alas 11:30 na sa gabii aron mokaog pan pinaresag sopdrink.

Maabtan bitaw mig siren sa alas 12:00 sa tungang gabii, nadakpan ming tanan sa pulis, uy! Aw, nakahigda gyod mig prisohan.

Pero, wala ko masuko ni Marcos. Dapat lang, nga masilotan mi kay nakasala man sa balaod. Gani, nakadayeg pa ko niya niadtong higayona.

Kay tungod sa Martial Law, ang kalungsoran, apil na ang amoa, nakasinatig tumang kahusay ug kalinaw sa pamuyo. Pobre lang gyod mi. Monang mokayod aron makakaon!

Apan pagkawagtang sa Martial Law, unya si Marcos gipulihan ni Cory, Fidel ug Ninoy, nawad-ag disiplina sa kaugalingon ang katawhan, uy! Ultimong Manila Bay, gihimo na lang basurahan! Maayo gani, kay may Tatay Digong, nga mipaguwapa niini pag-usab!