Reserba

Atol sa tulo ka adlaw nga pagbisita ni Senador Manny Pacquiao dinhi sa Sugbo sugod niadtong Domingo, makita na kinsay posibling iyang kauban sa kampanya alang eleksiyon karong Mayo sunod tuig.

Niadtong Domingo hingpit nga nanumpa si Pacquiao isip sakop sa Probinsiya Muna Development Iniative (PROMDI) diin siya gihimong national chairman niini. Atol sa kalihokan nga gipahigayon didto sa usa ka hotel sa dakbayan sa Sugbo, naghugop ang hapit tanang kapitan sa dakbayan sa Sugbo pinangulohan sa ABC President ug ex-officio member sa konseho sa dakbayan sa Sugbo nga si Franklyn Ong.

Si Ong nga posibling maoy kandidato sa Bando Osmeña Pundok Kauswagan (BOPK) pagkabise mayor sa dakbayan sa Sugbo, giingong mipadayag og suporta sa kandidatura ni Pacquiao pagkapresidente. Usa ray ipasabot sa presensiya ni Ong ug sa mga kapitan ug ubang dumadapig sa BOPK didto sa kalihukan ni Pacquiao, siya maoy ilang kandidato pagkapresidente.

Gipaabot hinuon ni tungod kay isip kandidato sa administrasyon, si Bise Mayor Michael Rama siguradong adto mopaluyo sa ituboy nga kandidato ni Presidente Rodrigo Duterte. Lig-on ug kasaligan ang makinarya sa BOPK dinhi sa dakbayan busa makasalig si Pacquiao nga dako ni og ikatampo sa iyang kandidatura.

Apan lahi ang sitwasyon sa dakbayan ug probinsiya sa Sugbo. Kadudahan og may epekto ba pagpalig-on sa iyang kandidatura ang pagpasakop niya sa PROMDI. Kun imong susihon pag-ayo, wa nay lig-ong lider nga nahabilin ang partido nga makatabang pagkabig og boto alang niya dinhi sa lalawigan sa Sugbo.

Kun wala ko masayop way bisan usa ka incumbent official ang PROMDI dinhi sa Sugbo. Ang posibling mahitabo mao nga makig-alyansa na pud siya og laing lokal nga partido dinhi sa Sugbo.

Ug sigun sa akong kasayuran, nakigtagbo na si Pacquiao sa mga membro sa BAKUD Party ni kanhi tourism secretary Ace Durano nga posibling mokandidato pagkagobernador atbang sa incumbent nga si Governor Gwen Garcia.

Hinuon, posibling lahi ang motibo ni Pacquiao sa pagpasakop sa PROMDI. Wala malilong ang nagpadayong kaguliyang sa liderato sa PDP-Laban sa pagkakaron tungod sa laing grupo nila ni Secretary Alfonso Cusi nga maoy gipaluyohan ni Duterte.

Nag-ilog pa ang duha ka grupo kinsay dunay katungod nila nga modala sa PDP-Laban. Sa higayon nga modaog ang grupo ni Cusi, way partido nga magamit si Pacquiao. Busa agi og pangandam sa maong posibilidad, nipasilong na siyang daan sa PROMDI aron mamahimo niyang reserba nga partido.