Maabli ka

Niay lab-as kasinatian nga gusto kong ipaambit sa mga alagad sa simbahan ilabi na sa mga lector ug cantor. Kasinatiang makapahigmata ug makahatag maayong pagtulon-an.

Sa wala pa magsugod ang buntagong misa sa miaging Domingo, akoy lector nga mibasa sa mass intentions gikan sa mga parokyanong nanimba.

Tapos mabatbat ang tanang pahinungod, gihangyo ko ang katawhan nga mangluhod ug magdungan pagsabat sa pangadyeon alang sa kanonisasiyon ni Bishop Teofilo Camomot.

Human malitok ang kataposang pulong ‘Amen’, nanaog ko gikan sa ambo ug milingkod sa naandang lingkoranan para sa lectors ug cantors.

Taudtaod, adunay miduol nakong usa ka edad-edarang babaye, mihikap sa akong bukton ug miingon: “Brad, may isulti lang ko.”

“Oh, Sis, unsa man kana?” kong tubag nga miabli gilayon sa ganghaan sa akong dughan.

Nangandam pagdawat sa bisan unsay mogawas gikan sa iyang baba.

“Brad, akong naobserbaran. Sagad sa kinsay modala sa pag-ampo para sa kanonisasiyon ni Bishop Teofilo diha sa ambo, dili gyud manguros, ay! Di ba ang lain rag tinuhoan ang dili manguros? Pero, Katoliko ta, Brad. Kinahanglang manguros gyod ta!”

“Uy, sorry kaayo, Sis, ha? Sorry gyud kaayo sa maong sipyat.”

Dali kong angkon sa maong espirituhanong praktis nga nataligam-an. “Unsaon, naggunit man god ko sa mikropono ug sa tamdanan sa pag-ampo.

Hinungdan, nga igo rang nasulti ang sign of the cross. Ug wala na mabuhat. Pero, sayop…dako gihapong sayop, Sis!” Dugang kong pamahayag.

“Thank you, sa imong pagpakabana, Sis, ha? Sige lang, sa sunod, manguros na ko.”

“Thank you pod, Brad!” Niya pa nga malipayong mipalayo. Unya wala magdugay, nagsugod ang misa.

Sa homiliya ni Fr. Love Alojipan, nakurat ko pag-ingon niyang: “Efata. Maabli ka!” Ebangheliyong bahin sa bungol ug amang nga giayo ni Hesus. Ang tawong bungol dili makamaong mosulti kay wala man siyay pulong madungog. Busa, mahimo gyong amang.

Dili sama niadtong babayeng miduol nako, kinsa hapsay militok sa mga mananoy’ng pulong nga makapahigugma sa pagpamati sa naminaw.

Busa, ang naminaw, nakat-on sab paggamit og mga malumong pulong nga makapahigugma sa pagpaminaw sa misulti.

Efata. Maabli ka! Gibuksan sa babaye ang natakpan kong kaisipan.

Ug naabli ang akong kasingkasing pagdawat sa unsay husto nga makapahimuot sa Diyos.