In and out
DALAWANG outsider, kung ituturing, ang bumabandera sa usapang Panguluhan sa 2022. Outsider dahil bagama’t nasa pamahalaan din sila, kapwa silang nasa local government at hindi sa national government na dati rati’y siyang pugad ng pinanggagalingan ng ating mga pinuno.
Ito’y sina Mayor Sara Duterte ng Davao City, ang pinakamalaking lungsod sa Pilipinas at si Mayor Isko Moreno ng Capital city ng Maynila. Maaring hindi pa deklarado sa ngayon si Mayor Sara sa kanyang kandidatura subalit inaasahan ang kanyang pagsabak sa laban bilang kandidata ng administrasyon. Si Mayor Isko naman ay nagpasabog na ng kanyang bomba nang maunang magdeklara itong nakaraang linggo, katiket ni Dr. Willie Ong, ang matagal na nating ka-column dito sa Pilipino Star NGAYON.
Dati rati ay pawang mga nasa gobyerno na ang mga nananalong Pangulo, mga Senador o Kongresistsa o miyembro ng Gabinete. Nakalusot lang minsan si Pres. Corazon Aquino subalit iba naman ang kuwento niya. Matapos niya ay balik muli sa mga personalidad mula sa national government ang nagwawagi.
Hindi mahirap intindihin kung bakit lumalamang ang nasa ganung posisyon. Dahil pang nasyonal ang kanilang panunungkulan, nakakaikot sila sa bansa at madalas ay laman sila ng mga news outlet. Siyempre, iyong mga nationally elected, lalo na ang mga senador, ay kilala na ng tao.
Subalit nagiba muli ang modelong iyan ng paglutang ni Rodrigo Roa Duterte na dati ring mayor ng Davao. Sa sandaling pangangampanya ay nahuli niya ang kiliti ng botante, kahit pa iilan lamang ang nakakakilala sa kanya sa umpisa.
Sina Mayor Isko at Mayor Sara ay kapwa nagmula rin sa local government subalit nasasabayan nila o kung hindi man ay nahihigitan pa ang kasikatan ng mga Insider. Para bang wala nang advantage ngayon ang mag matrikula muna sa Gabinete, Kongreso o Senado. Kahit saan ka magmula, basta maganda ang PR mo, maari kang maging contender.
Gaya ng mga huling halalan, pihadong magandang laban muli ang mangyayari sa Mayo. Sana ay maging maayos ang eleksiyon, ang kampanya, ang bilangan at ang ating pagpasya.
- Latest