Kahuyang sa liderato?

Nasagmuyô si VP Leni Robredo sa iyang kapakyas sa pagpakigtagbo sa ubang buot mokandidato pagka-presidente aron unta ma-umol ang hiniusa’ng pwersa sa oposisyon. Apan bisan pa, dili kuno siya mohunong sa pagkab-ot ni’ng maong tumong.  Daw timailhan man kini sa kahuyang ug ka-katag sa oposisyon. Ang usa ka kahugpongan dili lamang mahitungod sa pagtambayayong kon dili mahitungod usab sa pagsalig sa usag-usa.  Ni’ng nasinati nga leadership issues sa oposisyon, adunay panultihon nga, “Kon buot ka nga maghimo’g baroto, ayaw sugo-a ang kaubananan pagpangahoy ug ayaw usab sila hatagi’g gimbuhaton.  Hinonoa, tudlo-i sila paghandom sa kalapad sa kadagatan nga angay tadlason”.  Mao vah!

Sama sa lansis ni nanay

Bag-ong magtiayon ang nabiktima sa pagpangilad sa ilang wedding coordinator.  Nasagmuyô ang magtiayon pagkasayod nga walay bulak sa simbahan ug wala ma-book ang venue sa reception hinungdan nga walay pagkaon ang piging.  Nadakpan na ang mangingilad kinsa nadala sa tambalanan human usab misuway sa paghikog.  Walay mailad kon walay magpailad.  Apan ang ka-kuryoso ug ang buta nga pagsalig maoy hinungdan nga mahibulag ang hanggaw sa iyang bahandi.  Makapahinumdum sa lansis sa mga nanay nga nagkanayon, “Anak, gitagoan unâ ni Tatay nimo ang imong dinaygonan nga kwarta aron dili magasto”.  Madahaan!

Gihanigan ang pagbiyâ??

Bukas si VP Leni Robredo sa posibilidad sa dili pagdagan pagka-presidente karong eleksiyon sa 2022 kon kini maghatag kahigayonan nga mabuntog ang manok sa administrasyon’g Duterte. Pipila na lang ka adlaw magsugod na ang pagtahan sa kandidatura apan baniog pa ang kayagaw ug pagka-katag sa oposisyon.  Daghan ang paagi sa pagbiya sa kawsa.  Kinahanglan lang nga aduna’y exit strategy aron dili maulawan.  Mora’g gihanigan na man ni VP Robredo ang iyang pagtalaw ug pag-atras aron lang maingon nga adunay “graceful exit”.   Alams na?

Huni sa dalunggan

Mipasidaan si Presidente Duterte sa posible’ng pag-gamit sa militar kon adunay mabatyagan nga kagubot ug pagmaniobra sa resulta sa umaabot nga Eleksyon 2022.  Buot sa Presidente nga mopatigbabaw ang tunhay ug malinawon ang pagpahigayon sa eleksyon.  Huni sa dalunggan ang gipamulong sa Presidente, kana kon magpalingog-lingog kita sa kamatuoran nga mokandidato pa siya karong umaabot nga eleksyon.  Kay gina-ingon bitaw nga, “Ang pagpahigayon sa usa ka tunhay ug maki-angayon nga piniliay mas mahinungdanon pa sa resulta mismo sa eleksyon”.  Hinaut pa unta!

Imong tigmo, imong tubag!

Gihikyad na sa DOH ang pag-usab sa polisiya mahitungod sa face shield nunot sa kamandoan ni Presidente Duterte subay sa rekomendasyon sa DOH Technical Advisory Group nga anha na lamang kini gamiton sa mga high-risks nga kalihokan ug panagtigom. Sa mga pagtuon, nasayran nga walay tataw nga kaayohan nga makuha sa face shield.  Padayon ang pagmando sa IATF paggamit sa face shield ug sila lang usab ang makapahunong niini.  Haum ang gibuhat sa IATF ug DOH sa linya sa awit ni Yoyoy Villame nga nagkanayon, “Ikaw man ang nagtigmo, Imo sad badbaron”.  Baya no!