Pagbaton og kaikog

Mapasigarbohon ang Emergency Operation Center nga inanay na nga niubos ang mga aktibong kaso sa COVID dinhi sa dakbayan sa Sugbo ug ang critical care utilization rate sa mga tambalanan mibalik na sa safe level.

Apan bisan sa niarang-arang na nga sitwasyon padayong gipahimangnoan ni konsehal Joel Garganera, deputy chief implementer sa EOC, ang publiko nga di mokumpiyansa og ipadayon ang pag-amping.

Gani hangtud karon padayong gipatuman dinhi sa dakbayan ang “Oplan Puyo.”

Husto si Garganera, dili angayang mokumpiyansa aron di mausik ang tanang kahago ug sakripisyo sa mga frontliners.

Apan hinaut nga ang gipanulti sa atong mga opisyal sa dakbayan sa Sugbo ilang puy-an og apil. Hinaut nga magbaton sab sila og kaikog sa publiko nga ilang gialagaran ug sundon ang ilang kaugalingon nga mga lagda.

Niadtong Huwebes sa gabii gibuksan sa dakbayan sa Sugbo ang Carbon Bagsakan.

Ang Bagsakan maoy luna nga kasamtangang butangan sa mga vendors sa Carbon nga apektado sa nagpadayong joint venture sa dakbayan ug Megawide Corporation pagpalambo sa labing dakong merkado sa dakbayan sa Sugbo.

Atol sa programa nga gihimo sa dakbayan pag-abli sa Bagsakan makalilisang ang gidaghanon sa mga tawo nga mitambong.

Nahimong daw sama sa politikal rally ang kalihukan. Nganong gitugotan sa EOC ang sama niadto kadako nga panagtigom?

Sigun sa video nga nagpakita sa kalihokan daw sa dunay dakong party nga nahitabo sa Carbon atol sa maong higayon.

Mao ni nakadaot sa atong mga opisyal kay mga epokrito. Kun ang ordinaryong tawo di mahimo nga magtapuk-tapok, apan kun sila maoy mamolitika way gidili bisan panahon sa pandemya.

Hinaut nga di mosulbong pagbalik ang mga kaso sa COVID dinhi sa dakbayan human sa maong kalihokan.

Ug alang sa atong mga opisyal sa dakabayan palihog lang pagbaton og bisan dyutay’ng delicadeza. Labaw ni bisan kinsa kamo maoy angayang unang motuman sa mga lagda nga inyong gipatuman aron paghatag og ehemplo sa publiko. Unsaon ninyo pagpugos sa katawhan nga motuman sa inyong mga lagda kun kamo mismo way pupanagana nga milapas niini?