EDITORYAL - Pag-armas sa mga bombero

Dunay maayo nga tumong ang pag-armas sa dul-an 30 mil ka mga sakop sa Bureau of Fire Protection, apan ang pangutana kun gikinahanglan ba sa ilang trabaho ang armas nga tigsalbar man kaha sila sa mga kabtangan ug kinabuhi sa mga biktima sa kalamidad ug sunog.

Hinuon kaniadto duna man g’yuy armas ang mga bombero, apan miabot ang panahon nga giwagtang kini gumikan kay wala man sad kaayoy gamit para kanila tungod kay dili man parehas ilang trabaho sa kapolisan ug sa kasundalohan.

Tinuod usa ka law enforcement unit ang BFP apan limitado sila sa pagpakgang sa mga sunog ug uban pang kalamidad. Gitahasan sab sila paghimo og mga plano, pamaagi, estratehiya nga mamenusan ang danyos sa kabtangan ug ngadto sa katawhan kun dunay mga kalamidad.

Apan nganong kinahanglan man silang padad-on og armas kun mao nay ilang numero unong trabaho? Dunay mga miingon nga magamit nila kini panahon nga pagresponde kay kuno dunay mga tawong mangilog og hose aron unahon pagpasirit ang ilang balay.

Pagkamabaw nga rason ug pagkawala nalang sab konsiderasyon sa sitwasyon. Ang tawo nasunogan ug panimalay, tingali duna pa gyud sakop sa ilang pamilya nga na-trap sa sunog, unya makatarunganon ba silang gamitan og armas anang sitwasyon sa desperasyon?

Dili ba hinuon mosamot nga mabutang sa peligro ang kinabuhi sa bombero kung mao na. Ikaduha, madugang na hinuon kini sa problema kun dunay mahitabo. Dili ba naa may mga barangay tanod ug mga polis nga tahasan pagbantay sa palibot panahon nga dunay sunog? Nganong pasukbiton paman og armas ang bombero samtang nagkupot og firehose?

Tinuod dili sayon ang pagmentinar sa kahapsay ug kalinaw sa komunidad, apan duna may mga ahensiya sa gobiyernong maoy gitahasan gyud para niana, kinahanglan pa gyud nga moapil ang mga bombero anang trabahoa?

Imbes nga ipalit og mga armas, nganong dili nalang gamiton ang kwarta sa pagpalit og gikinahanglang mga gamit sama sa firetrucks, fire ladders, personnel fire protection, self-contain breathing apparatus, ambulansiya, rubber rescue boats, generators, ug daghan pang uban. Ang BFP maoy usa sa mga ahensiya sa gobiyerno nga gikinahanglan na og modernisasyon aron epektibo nilang mabuhat ang ilang tahas, apan dili armas ang ilang gikinahanglan.