Simpack irehistro

Giawhag karon sa Cebu City Council ang atong mga magbabalaod sa Senado ug Kongreso nga dalion nila ang pagpasar sa balaudnon nga magmando nga irehistro na gyud kadtong mopalit og mga sim card sa selpon.

Nindot kaayo nga irehistro na gyud ang mopalit og sim pack sa mga selpon aron dali ra nga mahibaw-an kon gamiton ang kahimanan sa kumunikasyon sa mga binuang, sama sa paghimo’g bomb threat.

Dugay ra kaayo ko nga nagsige’g paghot niini kay natan-aw nako nga bisan kami sa media, kanunay’ng mabiktima sa binuang sa mga tawo nga magpataka lang pagkomentaryo gamit ang selpon, unya dili magpaila.

Kinahanglan nga kadtong mopalit og sim card alang sa selpon, mopresentar og government ID, aron irehistro ang ilang mga ngalan.

Unya, hatagan og lista sa mga nakapalit og Sim card ang National Telecommunications Commission (NTC). Pinaagi niini, tingali magmatngon na ang mga tawo sa ilang paghimo’g binuang gamit ang selpon.

* * *

Maayo unta og dili supakon sa ubang konsehal sa Dakbayan sa Sugbo ang tinguha nga paghatag og subsidy sa mga water consumers sa MCWD nga ang magamit nga tubig dili mosubra sa 50 ka baril sa usa ka buwan.

Ang siyudad sa Sugbo mogahin og P200 milyones ngadto sa MCWD aron anha kuhaon ang kantidad bugti sa makolekta unta sa water district gikan sa bayad niadtong gagmay ra og konsumo nga tubig.

Kon may subra nga kwarta gikan sa gigahin sa Cebu City government ngadto sa MCWD, gamiton kini sa pagpalambo sa mga tinubdan sa tubig aron nga mapalambo ang pagserbisyo sa mga water consumers.

Angay usab nga tabangan sa Cebu City government ang MCWD aron masiguro nga makasuplay gyud kini og limpyong tubig sa mga lumolupyo dinhi sa siyudad.

Daghang tinubdan sa tubig nga anaa sa atong kabukiran sa siyudad nga magamit aron ang MCWD makatubag sa panginahanglan sa katawhan.

Apan kinahanglan kini nga gahinan og budget aron nga madala ang tubig dinhi sa siyudad, ug kon may subra sa kantidad nga ihatag sa Cebu City government, dako na kaayo ni og matampo.

* * *

Uyon ang kadagkoan sa kagamhanan nga ang mo-travel sa laing mga probinsiya nga nabakunahan na, dili na lang ipa-swab test.

Apan ang problema nga napanglantawan sa mga opisyal, kay sigurado nga daghan ang maghimohimo og mga fake nga vaccination certificate.

Ang gihisgotan karon kon unsaon pag-alkontra niining mga tawo nga mamaligya unya og mga peke nga vaccination certificate nga mora gyud og orihinal.

Maayo ang nahunahunaan nga kadtong mga tawo nga masakpang nigamit og peke nga vaccination certificate, apilon sa pagsilot.