EDITORYAL - Bag-ong CCMC

Gipaabot nga maarang-arang na unya ang operasyon sa Cebu City Medical Center karong giablihan na aron gamiton ang ikaduha ug ikatulong andana niini.

Kini kun nakatimaan pa sila sa pagsaway nga gibato kanila sa mga pasyenteng wala matagbaw sa ilang serbisyo.

Gipasirado ug gibalhin sa buhatan  ang operasyon sa CCMC diha sa Bureau of Fire Protection regional office tungod peligrong mahugno ang building niini nga karaan human sa kusog nga linog  pipila ka tuig na ang nakalabay.

Tungod sab adto daghang serbisyong kaya kaniadto sa maong tambalanan ang nawagtang hinungdan nga ang mga taga Cebu City adto na sa Vicente Sotto Memorial Medical Center  o ba kaha mapugos nga adto sa mga mas mahal nga pribadong tambalanan magpatambal.

Pinaagi unta niining bag-ong building, malaumon ang mga Sugbuanon nga hasta sab unta ang ilang serbisyo ngadto sa katawhan isip usa ka public hospital mas nindot pa kaysa kaniadto.

Ang bag-ong edipisyo sa CCMC gidesinyo og napulo ka andana. Kun mahuman kini daghan gyung mga pasyente ang maserbisyohan niini ilabi na ang mga kabus.

Kaniadto dangpanan sa mga kabus nga taga Cebu City ug kadtong gikan sa mga silingang probinsya ang CCMC.

Apan samtang tuod libre, daghan kaayo og mga kakuwangon sa gamit ug personnel ang maoing tambalanan aron maatiman og tarong ang pasyente.

Unta kun makabalik na gyud sa kinapungkayan sa operasyon ang CCMC dili na sab unta masubli ang kaniadto mga gipangsaway nganha kanila tungod sa dili maayong serbisyo sa pipila ka mga kawani ug mismo sa mga gamit.

Pirme gyud kining madungog gikan sa mga pasyente ug ilang mga kabanay kun ma-admit na gani sa CCMC,  ‘ultimo gapas’ ang pasyente pa maoy papaliton.

Kinahanglan lang gyud nga tutokan kini og suporta sa kagamhanan sa Cebu City inabagan sa ubang mga ahensiya sa gobiyerno ug mga magbabalaod aron di na masigurong ang kapabilidad ug kalidad sa serbisyo sa CCMC dili masakripisyo .

Kay mag-unsa raman unya ng pang world class nga building sa tambalanan kun ang personnel ug serbisyo lupigon pa sa klinika sa mga hilit nga barrio?