Bakuna

Kagahapong adlawa mao ang akong ikaduhang dose sa COVID-19 vaccine nga Moderna. Dili sama sa una nakong dose nga milanat og pila ka oras ang akong pagpabakuna, karon wala ra maabti og oras. Kini tungod sa ka gamay na lang sa nagpabakuna.

Sa una nakong dose, puno-puno ang Noah pero karon sa akong ikaduhang dose gamay nalang ang nagpabakuna.

Ngano kaha nga migamay man ang mga nagpabakuna? Nag-alanganin ba gihapon ang mga tawo nga wala pa magpabakuna sa ilang pagtuo sa bakuna ug ang nagpasulabi sa ilang huna-huna ang kahadlok niini?

Ang Emergency Operation Center (EOC) may lain nga gituohan.

Sila nagtuo nga ang hinungdan sa pagminus sa gidaghanon sa mga nagpabakuna mao ang pagpamili sa mga tawo sa bakuna nga gusto nilang ibakuna.

Pero nagduda ko nga dili gayud kini ang tinuod nga hinungdan sa pag-ubos sa gidaghanon sa mga nagpabakuna kay kun ang rason mao ang pagpamili sa mga tawo sa bakuna nga maoy ilang gusto dili pod seguro kini sila daghan kaayo.

Ako nagtuo nga nagpasulabi pa gihapon sa mga tawo nga wala pa magpabakuna ang ilang kahadlok sa bakuna nga basin ma-COVID-19 o mamatay na hinuon kun magpabakuna. Dugang pa usab niini ang pag positibo gihapon sa mga tawo nga bakunado na.

Ang mga tawo nagduda usab sa datus nga gipagawas sa mga eksperto sa panglawas tungod kay dili kini transparent sa ilang taho o balita.

Kun duna gani mamatay, ang mga eksperto sa panglawas modayon og ingon nga ang namatay, namatay sa COVID-19 kay dili bakunado pero kun adunay mamatay sa COVID-19 bisan pa og bakunado na, ang mga eksperto sa panglawas modayon lang sa pag-ingon nga ang namatay, namatay dili tungod kay gibakunahan kun dili namatay sa sakit na niining daan.