Palad nga makasamad

Sakit kaayo ang palad sa pandemiya nga mitamparos sa atong kinabuhi. Daghang negosyo ang nangalusno. Daghan ang nawad-ag kapanginabuhian. Halos tanan, nakigbisog nga ang sugang gibitbit nga gihuyop sa naghaguros nga coronavirus, dili mapalong.

Apan ubay-ubay ang gilupig, wala makalahutay. Napagngan gayod sa hingpit nga paglaum. Ug nangapukan! Mga ospital? Napuno ug miawas. Punenariya? Ang ipang-cremate nanaglinya. Menteryo? Mga gipanglubong naglut-odlut-od. Mga panteyon nangalusno!

Angay hinumdoman. Daghan nang doktor ug nars ang nangamatay diha sa ilang pagpakigkombati batok sa COVID-19 aron ang mga pasyente, kinsa nag-ungaw na sa kamatayon, mabuhi. Gibuhis nila ilang kinabuhi sa pagpangalagad bisag gamay ra ilang suweldo, unya dili pa dayon ihatag sa atong gobiyerno.

Giisip silang modern hero. Pero, gikoronahan ba silag bulawan sa atong kagamhaan? Or, igo ra silang giulog-ulogan? Hain na ba ang kasingkasing nga mipasiatab, nga gihigugma niya ang iyang gingsakopan?

Usa ka health worker miduol-tug-an nako, nga sa kadako kunong nagasto sa kagamhanan sa pagpamalit og PPE sets, apan bisan kausa, wala sila padad-i. Mao ba?

Niining bag-o, tungod kay gipahimug-atan pag-ayo ang health protocols, gidili ang pagpanaygon sa kadalanan ug kabalayan. Ug usab, ang magpakilimos sa karsada.

Apan sa miaging Domingo, Septiyembre 12, pasado alas 8:00 sa buntag, human maka-withdraw si misis sa ATM, nagdali siyang misulod sa among sakyanan dihang may itomong babaye nga misunod-apas niya.

Himsog ug isog ra ba kaayog nawong nga midip-ig sa passenger’s door. Unya, morag bumirahay’ng hold-aper, mapugsanong nangayog kuwarta ni misis.

Kay nakuyawan, wa mangabli akong kapikas sa bentana. Hinuon, misenyas nga dili lang sa mi mohatag.

Pastilan, imbes molikay, nasuko man hinuon ug gidukdok among bentana. Unya, milabang sa pikas dalan, diin mao na poy giduol kadtong batan-ong dalaga nga nag-withdraw sa ATM sa laing banko.

Giatngan niya ang dalaga kanus-a mahuman ug mao na poy gisurangsurang. Puwerte intawong paspasa sa dalagang misakay sa nagpaabot nga kotse aron makalikay sa nagpanguhit binukhad nga palad sa gikahadlokan.

Ning padayong pagpangulata ni COVID-19 sa atong nasud, gikan sa kagamhanan ngadto sa katawhan, atong masaksihan ug masinati ang nakalainlaing matang sa mga palad nga nanaglihok sa atong palibot aron lang mabuhi.  Mga palad, nga sa atong dughan makasamad.