Trapo

Suportado sa liderato sa Alayon sa unang distrito sa lalawigan sa Sugbo si Atty. Ragiv Enad, konsehal sa lungsod sa Minglanilla sa iyang pagpapili pagkamayor sa nahisgotang lungsod. Maoy bise niya ang kasamtangang Mayor sa lungsod nga si Elanito Peña.

Mao diay nga nanghatag na og sinakong bugas ang abogado nga adunay marka sa iyang pangalan kay magpapili diay kini sa pagkamayor. Ang gibuhat sa abogado binuhatan sa mga gitawag kaniadto og “trapo” o traditional politician nga sa pagkakaron gitawag na og “Epal,” kortesiya sa namatay na nga Senador Miriam Defensor Santiago.

Si Konsehal Ragiv Enad anak ni Celeste “Sandy” Enad, kanhi Chairman sa Bids and Awards Committee (BAC) kinsa gitangtang sa Ombudsman human mapamatud-i nga sad-an sa kasong grave misconduct niadtong Hunyo 2017 tungod sa pagwaldas sa usa ka milyon ka pesos lnga pundo gikan sa Ginintoang Ani Program nga nadawat sa lungsod sa Minglanilla panahon ni Presidente Gloria Macapagal Arroyo niadtong tuig 2008.

Kauban ni Celeste “Sandy” Enad nga gitangtang sa katungdanan mao ang iyang mga kauban sa BAC nga sila si Wilfredo Alidon, Municipal Treasurer; Nestor Sotes, Municipal Engineer; Clemente Lavador, Municipal Assessor; Zenaida Jakosalem, Municipal Civil Registrar; ug Brenda Java, Municipal Accountant.

Gawas nga gitangtang sa katungdanan, gidid-an pa gyod sila nga makakupot bisan unsa nga posisyon sa gobiyerno, gikanselar ang ilang civil service eligibility ug gi-forfeit ang ilang mga retirement benefits. Ang nahisgotan nga mga opisyal nagsilbing sakop sa BAC panahon ni Mayor Eduardo Selma.

Ang Ragiv Enad-Elanito Peña tandem suportado sa partido nga Alayon nga gipangulohan sa mga Gullas. Apan dili kaha mausab ang kamada sa politika sa lungsod sa Minglanilla samtang magkaduol ang bugnong lugaynon sa Mayo 2022?

Sa report ni Super Gabriel Bonjoc sa akong programa sa radyo niadtong Sabado, magpapili usab sa pagkamayor sa lungsod sa Minglanilla si Jojo Selma, kanhi bise mayor sa lungsod ug Jigger Selma Canedo. Si Jojo, uyoan ni Samsam Gullas samtang si Jigger, iga-gaw ni Samsam.

Tutok lang mo sa politika sa Minglanilla.