EDITORYAL - Paglisan ng healthcare workers, ramdam na

SETYEMBRE 1 pa nagbanta ang healthcare wor-kers (HCWs) sa pribado at pampublikong ospital na magsasagawa sila ng mass resignation kapag hindi pa ibinigay ng pamahalaan ang ipinangakong benepisyo na kinabibilangan ng special risk allowance (SRA) ganundin ang kanilang food and transportation allowance.

Ngayon ay nararamdaman na ang banta ng HCWs sapagkat may mga nagsisipagbitiw na sa kanila. Ang patuloy na pagbingi-bingihan ng Department of Health (DOH) ang nagtutulak sa kanila para ituloy ang malawakang resignation.

At maaaring makadagdag pa ang nangyaring sigalot sa pagitan ni Presidential Spokesperson Harry Roque at mga doktor. Nagbitiw nang mga masasakit na salita si Roque na hindi nagustuhan ng ilang doktor. Humingi na ng paumanhin si Roque.

Ayon sa mga nagprotestang HCWs, umaabot sa P11 bilyon ang hindi nababayarang benepisyo at SRA ng HCWs. Sa 1.8 milyong HCWs, maliit na porsiyento pa lamang umano ang nabibigyan ng benepisyo at allowances. Ito ay sa kabila na ipinag-utos na ni President Duterte sa DOH at Department of Budget and Management (DBM) na ibigay na ang mga benepisyo at allowances ng HCWs. Ang patuloy umanong pagbibingi-bingihan ng DOH ay lalong nagpapagalit sa HCWs.

Noong Huwebes, 10 volunteer doctors sa Philippine General Hospital (PGH) ang nagbitiw sa tungkulin. Ayon kay Dr. Jonas del Rosario, tagapagsalita ng PGH, iginagalang nila ang desisyon ng mga doktor. Inamin ni Del Rosario na malaking kawalan sa PGH ang pagbibitiw ng mga ito. Ayon kay Del Rosario, hindi nila matiyak ang kadahilanan ng pagbibitiw pero maaaring masabi na napagod na ang mga doktor. Napakarami umano nilang trabaho. Marami na rin umanong doktor ang nagka-COVID. Isa rin sa dahilan nang pagbibitiw ay maaaring gusto nilang magtrabaho sa ibang ospital na mas malaki ang kita.

Hindi man kunektado ang pagbibitiw ng 10 doktor sa PGH sa kasalukuyang ipinaglalaban ng HCWs, hindi maikakaila na marami sa kanila ang pagod na pagod na. At lalo pang sumisiklab ang pagod at hirap kung ang kanilang hinihinging benepisyo ay ipinagkakait pa.

Pigilan ang kanilang pagbibitiw sa pamamagitan ng pagbuhos ng mga umaapaw na biyaya. Nararapat ito sapagkat bayani sila ng bagong panahon. Ipagkaloob na ang mga benepisyong ipinangako sa kanila.