Pacquiao mitalaw

Kon unsay mga pulong nga nalabay sa baba, dili na kini mapunit aron mabalik pagsulod. Mao nga importante gayod, nga kita magmatngon kanunay sa atong sinultian aron dili ta makapasakit sa atong isig ka ingon. “Kay ang mosulod sa baba dili makahugaw sa tawo. Kondili, ang mogula ini.” (Mateo 15:11).

Si Senador Manny Pacquiao miingon, nga ang kahimtang sa korapsiyon sa gobiyerno karon ubos sa pagpamunoan ni Duterte, hasta katulo kuno pilopiloa ang pagsaka kon ikomparar kanhi sa administrasiyon ni anhing PNoy Aquino.

 Pasangil nga wala magustoi sa tanang Diehard Duterte Supporters, sanglit ilang naobserbaran nga ang korapsiyon anaa pa man tuod, pero miminus na.

Labi na ni Pastor Apollo C. Quiboloy, kinsa nakadayeg sa daghang kalamboan nga nahimo ni Duterte sa atong nasud nga wala gyod mabuhat sa mga nangaging namunoan, dili makadawat sa maong pamahayag ni Pacquiao. Kay kini dili tinuod.

Hinungdan, nga base sa unsay gipangyawit ni Pacquiao sa publiko sama niadtong nahuptan niyang diploma isip graduwado sa Bachelor of Arts in Political Science, giutingkay ug gipautingkay ni Pastor Apollo ang rekord ni Manny sa eskuylahan aron pagsuta unsa ka tiunay kining tanan?

Dinhi magsugod ang panagbangi nilang duha. Diin, nagkaanam kadako ug kainit ang pagbinayloay nilag mga pamahayag nunot sa pagdis-og sa panahon.

Hangtod misangko ngadto sa pagbahad ni Pacquiao, nga iya kunong pasakaag kaso si Quiboloy kay nagbuhatbuhat lag fabricated issues bahin sa P3.5B Sarangani Sports Complex project ni Pacquiao.

Gani, gikuwestiyon pa niya ang pagka-pastor ni Quibuloy ug dinha pay higayon nga ginganlan niya ang pastor og psychologically imbalanced.

Hinuon, gikataw-an lang si Manny ni Apollo ug giingnan, nga mga kaso maoy iyang kinaon ug sukad masukad, wala pa siya mapilde.

Unya, gihagad pa si Pacquiao ni Quiboloy nga magdebate sila one on one bahin sa mga issue nga ilang tukion gamit ang Iningles pinulongan. Buwahan, ang katawhan nay mohukom kinsa ang husto nilang duha?

Apan hangtod sa pagsulat niini, wala pay balita nga gisang-at na ni Manny ang kaso batok ni Apollo.

Mitalaw kaha si Pacquiao? Dili ba, matod niya, inside and outside the ring, wala siyay gikahadlokan?

Dinhi, atong masayran unsa siya kamatinud-anon sa iyang mga pulong?