Kasikas sa politika

Hingpit na'ng mideklarar si Cebu City Vice Mayor Mike Rama sa iyang kandidatura pagkamayor sa dakbayan sunod tuig.

Gipaabot na hinuon ning daan tungod kay sukad sa unang adlaw sa iyang paglingkod isip bise mayor, nagpakita na siya og interes nga mobalik gyud pagkamayor.

Gani ang tataw nga interes ni Rama nga mobalik pagkamayor maoy hinungdan nganong bisan giunsa nila og limod ang guna sa relasyon sa kampo ni Mayor Edgar Labella wa gyud kini malilong.

Ang intramural sud sa ilang partido maoy hinungdan nganong ang uban nila mibuwag og mideklarar nga mag-independente.

Di sab hinuon ikalimod nga posibling ang naghingapin nga ambisyon maoy usa sa nakaaghat nila nga mobuwag sa partido.

Laing timailhan sa guna sa kampo ni Labella ug Rama mao ang pagdeklarar sa bise mayor nga molansar sa way pagpangonsulta sa mayor.

Si Rama miangkon sa akong interview sa The Freeman Conversations sa miaging gabii nga wala siya mananghid ni Labella sa iyang gihimo. Kini tungod kay Hulyo 1 pa sila katapusan nga nagkaestoryahay pinaagi sa text.

Wala nalang sab kuno siya mo text aron mananghid tungod kay daghan nang higayon nga wala siya tubaga niini. Sa laktud wala na isipa ni Rama si Labella nga maoy lider sa ilang kwalisyon ug gituboy iyang kaugalingon nga maoy mangulo niini.

Kun mosunod ang ubang membro sa Barug-PDP Laban wala pa ta masayod. Ang tataw lang sa pagkakaron mao silang Dondon Hontiveros ug Philip Zafra nga mideklarar na nga mag-independente.

Kwestiyonable pa sab makuha ba ni Rama ang suporta sa Kusug Party nilang Konsehal Raymond Garcia ug ang Partido Panaghiusa ni kanhi konsehal Joey Daluz.

Si Rama hinuon miingon nga si Garcia maoy posible niyang runningmate. Apan nganong wala si Garcia dihang mihimo siya sa deklarasyon? Nganong wala sila magdungan og deklarar?

Dili kaha tungod kay dunay laing kandidato si Garcia pagkamayor? Sibaw ang mga kasayuran nga posibling si MCWD chairman Joey Daluz sa Partido Panaghiusa maoy mahimong kauban ni Garcia.

Sa pikas bahin, gikatahong wala pa sab magkasabot ang BOPK kinsay ilang kandidato pagkamayor.

Kini tungod kay wala pa mohukom si kanhi mayor Tomas Osmeña mopapili ba pagbalik.  Si Kongresista Bebot Abellanosa hinuon interesado kaayo nga magmayor kana kun dili molansar si Osmeña.

Kun mopapili si Osmeña nagtinguha sab si Abellanosa nga maoy mamahimong runningmate.

Apan unsaon si ABC President Franklyn Ong nga nakapanukad na sab?

Tali ni Abellanosa ug ni Ong mas pabor kun ang naulahi maoy mamahimong tandem ni Osmeña sanglit gikan kini sa norte distrito.

Laing posibleng option mao nga si kanhi konsehal Margot Osmeña maoy molansar pagkamayor samtang si Tomas maoy mokandidato pagkakongresista sa south district.

Ang north district medyo samok tungod kay sigun sa akong kasaturan nga nahipos gusto sa mga lider sa BOPK nga si Mary Ann delos Santos ang mamahimong kandidato sa Kongreso apan ang anak ni anhing kongresista Raul del Mar nga si Cutie gikatahong di sab magpapugong sa tinguha niini nga mokandidato.