Kumbati na!

Nakabasa ko og jurisprudence sa usa ka kaso didto sa Estados Unidos kay gipamulta ang usa ka bangko kay naulawan ang ilang kliyente dihang wa gi-honor ang pagbayad niini gamit ang giisyu nilang credit card.

Ang isyu niadto kay dugay nga napatik sa ilang computer system ang kantidad nga gibayad sa card holder nga ilang kliyente, ug gisuspenso nila ang credit card. Way kasayoran ang card holder, iya kining gigamit ang wa gi-honor. Sa kauwaw sa card holder, gikiha niya ang bangko ug nakabayad og kapin sa milyon dolyares ang bangko ngadto sa ilang kliyente.

Ingon niini ang nahitabo kanako sa Hongkong Shanghai Bank Corporation (HSBC) nga bisan og nakabayad na ko kaniadtong Septiyembre 3, apan gisuspenso nila ang akong card kay wa pa kuno sila makadawat sa akong bayad.

Ang pagbayad nako didto gihimo sa ila mismo nga bangko sa Ayala Business Park. Kon pananglit ang ilang computer system palpak ug wa dayon makarekord sa akong gibayad, ako diay ang maproblema?

Kon sa binugoy pa nga sinultihan, pagkatuytoy ninyo nga mga opisyal sa maong bangko. Ang akong bayranan P646 ra gani apan nibayad ko og P2,000 aron may pundo ko para sa sunod nga tingbayad.

Pagka wa ninyo’y ayo ug maayo lang pangtaktakon sa inyong mga trabaho.

* * *

Mahulagway tingali nga gubot pa’s lukot ang eleksyon dinhi sa Cebu City kon daghan kaayong managan sa mga dagkong posisyon sa kagamhanan.

Konpirmado na nga si Vice Mayor Michael Rama modagan pagka mayor kay dili na man kuno modagan si Mayor Edgar Labella.

Unya, modagan sab si Kongresista Bebot Abellanosa, ug gituohan usab nga si kanhi konsehal Joey Daluz III modagan usab pagka mayor kon ituboy siya ni Mayor Sara Duterte.

Nagtuo ra ba gyud ko nga si Inday Sara modagan gyud sa pagka presidente ug mao ni ang magsilbi nga kandidato sa administrasyon.

Kanang mga gibalita nga si Senador Bong Go modagan, tan-aw nako mga paukyab ra na, apil nga paukyab nga si

Presidente Duterte modagan kuno pagka vice president.

Pwerteng alegreha gyud sa eleksyon dinhi sa Cebu City kon mao na. Diha hinuon sa Mandaue, sila si Mayor Jonas Cortes ingon man si Kongresista Lolypop Ouano-Dizon, way mga lig-ong kaatbang.

Puwede ra gani tingali nga maghayang-hayang ra sila. Ang daganan ni Lolypop mao na man ang pagka kongresista sa Mandaue City lone district.

Sa Lapu-Lapu City, pwerte gyud nga pakulo ni Mayor Ahong Chan, moapil na gud pagtrabaho sa karsada aron modayeg kaniya ang katawhan ug botahan siya atol sa eleksyon.

Dunay mga nagkatawa sa maong gimmick.