Dili tanan bikers balasubas pero

Daghan o kasagaran sa mga bikers nga akong kaila mga buotan og responsable sa paggamit sa agianan nga gi-designate alang kanila nga mao ang gitawag nga bike lane.

Apan dili pud ikalimod nga anaay mga feeling entitled sa karsada tungod lagi kay naay katungod nga moagi.

Wala may kwestyon ana kay ang tanan aduna may katungod nga moagi bisan kon magbaklay, mag bike, mag-motor ug mag-awto bisan mag-bus.

Mao kining batasana nga magpasulabi nga magsalig nga katungod nako nga moagi sa karsada busa mosangpot na hineon sa pagkawagtang sa respeto sa usag usa.

Sama sa nahitabo sa dakbayan sa Mandaue nga sunodsunod nga adunay nahitabong road rage nga naglambigit og mga bikers tungod kay gipatigbabaw ang kainit sa ulo.

Niining bag-o lang nakuhaan na usab sa CCTV sa Barangay Alang Alang, Mandaue City ang grupo sa mga bikers nga mikomprontasi sa usa ka driver sa multicab nanghanggat pa kuno og sinumbagay.

Ang hinungdan mao ra gyud ang pagserbato o pagbosina sa driver sa mga bikers nga naka okupar na sa karsada sa ilang pagbesiklita nga delikado sa mga bikers ug delikado usab sa ubang mga sakyanan nga nagsunod kanila.

Moingon ang uban nga bisan kinsa kuno kon segi og serbatohan masuko gyud pastilan pagkatoytoy kaayo nga komento, ang pagbosina sinyalis kana nga palikayon ang si bisan kinsa sa nagsunod nga disgrasya.

Makasakit diay ang bosina. Aw, sakit seguro alang sa mga bikers nga hambugero ilabi na kadtong mga tubig tubigan o datu nga nag-leisure biking o nag-workout lang nga gibosinahan sila sa usa ka multicab.

Alangan man kong dili sige bosinahan nga dili man magpadaplin ang mga bikers.

Huwaton gyud sila nga maabot sa ilang destinasyon, maayo man sila nga lingaw lingaw ra man ang pagbesiklita.

Apan alang sa uban nga nagtrabaho nga nag apas nga mahatod ang angayang ihatod sama sa multicab driver nga magdeliver og lechon.

Kining batasan sa uban nga hilabahan ka hilas labi na og mahalon seguro nga biseklita ang ilang gisakyan, kong makapanghanggat og sinumbagay murag sure nga siya ang winner, maayo gani wala siya patuli sa driver kay kong putong pa to og utok ang driver giligsan na ang biker nga hilabihan ka isog.

Sa pagmaneho bisan unsa nga sakyanan gikinahanglan nga ipatigbabaw ang respeto sa usag usa, mohatag og agianan kay sa magpaugat aron walay gubot.

Lahi na ra ba ang panahon karon kay dali ra kaayo mag-trending nga ang mopahit mao ang mga netizens. Kulitogon ra ba gyud kinsa ang mga nagminaldito madamay pa ang uban nga himohimoan og mga meme.