Pahimulos sa pandemiya

Gihangyo sa Emergency Operation Center (EOC) ang National Bureau of Investigation ug Criminal Investigation and Detection Group-7 sa paglutos sa mga tawo nga namintaha sa kataas sa panginahanglan sa tambal nga gigamit sa pagtratar sa mga tawo nga gipang-COVID-19 pinaagi sa pagpasulbong sa presyo niini.

Giawhag usab sa EOC ang Department of Health, Food and Drug Administration-Visayas, Department of Trade and Industry ug ang Office of the Presidential Assistant for the Visayas sa pagpanginlabot na ug sa pagtabang nga makontrolar ang pagmahal sa presyo sa mga tambal nga makatabang sa pagluwas sa mga na-COVID-19.

Ang EOC mihangyo nga ang mga presyo sa life saving medications sa mga gi-COVID-19 makontrolar aron mababagan ang pagtago niini ug aron mahatagan og kahigayonan ang mga pasyente nga maluwas sa sakit. Mao kini ang unod sa suwat nga gipadala ni konsehal Joel Garganera, Deputy Implementor sa EOC ngadto sa nahisgotang mga ahensiya sa gobiyerno.  Basi sa monitoring sa EOC sa buwan sa Hulyo ang presyo sa Favipiravir 200mg nga tabletas (40 tablets) misaka gikan sa P10,500 ngadto na sa P12,000 sa buwan sa Agosto. Samtang ang prisyo sa 100mg/20ml nga Remdesivier nga tag P4,000 anaa na sa tag P6,000. Ang tag P75,000 nga 400mg/20ml nga Tocilizumab anaa na sa tag P130,000.

Ang gisugyot nga presyo nga nadawat sa DOH nagpakita nga ang Favipiravir nga 200mg nagkantidad lamang og P240.63 nga maoy pinakaubos nga presyo ug tag P310 ang pinakabarato. Samtang ang 100ml nga vial sa Remdesiver anaa lamang sa tag P1,500 ang pinakabarato ug ang pinakamahal nagkantidad og tag P8,200. Unya ang Tocilizumab ang prisyo sa 200mg/10ml vial anaa lamang sa P13,006.22 samatang ang 400mg/20ml nga vial anaa lamang sa kantidad P25,726.81 o P25,736.81. Ang presyo sa 80mg/4ml nga vial anaa lamang sa P7,867.06 nga mao ang pinaubos ug P8,303.57 ang pinakataas.

Tungod niini, maingon nato nga ang gipang-COVID-19, dili mamatay sa COVID-19 kun dili mamatay sila sa ka mahal sa tambal. Ngano kaha nga may mga tawo man nga magpahimulos sa pandimiya ug masakiton?

* * *

Happy Birthday sa kaluha (Hennah Marie ug Hannah Marie Auxilio) nga nagsaulog sa ilang ika-21 ka tuig nga adlaw nga natawhan karong adlawa. Gikan ni Papa, Mama, Kuya ug Ate.