Hands-on kinahanglan

Katungod sa publiko nga masayod unsay kahimtang sa panglawas sa ilang mga opisyal nga gisangonan pagdumala sa renda sa pangagamhanan.

Ug responsibilidad sa mga piniling opisyal ang pagtug-an ngadto sa katawhan unsay estado sa ilang panglawas sa ngalan sa transparency.

Pinaagi sa pagpadayag sa kahimtang sa ilang panglawas masuta unsa sila kamatinud-anon sa pagpangalagad ug masayran  sa publiko haum pa ba ang ilang mga opisyal nga modumala sa kagamhanan ug mohimo sa tahas nga gisangon kanila.

Apan nganong lisud alang ni Mayor Edgardo Labella ang pagtug-an unsay tinuod nga kahimtang sa iyang panglawas?

Dugay na nga namatikdan sa publiko ang dakong kausaban sa hitsura sa mayor ug ang tataw nga mga timailhan nga duna siyay gihambin nga balatian.

Gani sulod niining tuiga, lima na kahigayon nga siya mi leave sa trabaho ug mitugyan sa pagdumala sa dakbayan ngadto ni Bise Mayor Michael Rama isip acting mayor.

Bisan sa mga higayon sulod niining tuiga nga siya maoy nagdumala sa renda sa City Hall dili hapit igkita si Labella diha sa iyang opisina.

Gani sukad sa iyang pagbalik og trabaho niadtong Agosto 19 human sa iyang recovery sa pneumonia, work-from-home si Labella tungod kay maoy tugon sa iyang doktor hangtud sa iyang subling pagtugyan sa pagdumala sa dakbayan ngadto kang Rama sugod niadtong Septembre 2 hangtud sa 7.

Way rason siya nga gihatag nganong kinahanglan na sab siya nga mo leave bisan bag-o pa siyang mibalik sa trabaho.

Hangtud karon wa say klarong katin-awan ang kampo sa  mayor unsa gyuy tinuod nga kahimtang sa iyang panglawas.

Niining panahon sa pandemya diin ang dakbayan sa Sugbo usa sa mga dapit sa nasud nga dunay taas nga kaso sa COVID-19, gikinahanglan ang lider nga hands-on sa trabaho.

Ug tali nilang Labella ug Rama mas makahatag ang naulahi sa gikinahanglang pag-atiman sa problema.

Busa kun dili na mahatag ni Labella ang igong panahon ug kusog sa pag-atiman sa dakong problema nga gisagubang sa dakbayan tungod sa personal niyang problema, tingali makiangayon alang sa mga magbubuhis sa dakbayan sa Sugbo nga moluwat siya sa katungdan ug itugyan ang pagdumala sa dakbayan ngadto ni Rama.

Mas makiangayon ni dili lang sa publiko kun dili lakip na sa iyang kaugalingon. Nagkinahanglan si Labella og igong paguway aron hingpit nga maayo sa unsa man nga balatian nga iya karong gihambin.

Wala na siyay angay pa nga pamatud-an tungod kay sa mga higayon nga baskog ug lig-on pa ang kahimtang sa iyang panglawas sinsero ug matinud-anon ang iyang pagpangalagad sa katawhan.