Bakuna sa kinabuhi

Usa ra ang kinabuhi sa tawo. Busa, ampingan! Ug mao kini ang makita sa katawhan ning padayong pagpanghasi ni COVID-19.

Gusto silang dili mataptan. Dili matakdan. Ug makalikay. Kay nahadlok mamatay.

Pero subo palandungon. Kay bisag ang mga bakuna nga maisip hinagiban sa atong panglawas diha sa pagpakig-away nato sa COVID-19, ania na, nagpanawag og: “Dali, pagpa-vaccine na,” daghan gihapon ang nagduhaduha sa pagpatusok ug nangahadlok. Ngano?

Aniay rason sa usa ka kustomer sa sikat nga restawran dihang mipalit kog ‘sud-an’ para paniudto, Agosto 31, 2021: “Kining tanang vaccine nga namugna, di pa matawag nga perfect.

Mahulog nga experimental gihapon. Hinungdan, nga bisag fully vaccinated na, aduna gihapoy mamatay.”

Unya, samtang nanotpik, siya mipadayon: “Ngilo paminawon. Niini lang bag-o, tulo ka senior ang sunodsunod nangamatay. Pulos pa nako suod. Kini walay labot sa among silingan nga ang magtiayon nagdungan gyod og kamatay. Sila tanan, fully vaccinated. Monang, kuyawan ko!”

Duroha ra man ang nangaong kustomer niadtong tungora, nakahigayon ang mga food server pagpangutana: “Unya, ikaw, Boss, nagpabakuna ka na?”

“Aw, oo, kompleto na! Mao ganing nahadlok ko. Kay ang higala nakong doktor mitug-an, nga ubay-ubay silang mananambal, hangtod karon wa pa magpa-vaccine.”

Dinhi, misalga ko. Mipahayag, nga tinuoray adunay fully vaccinated nga nangamatay.  Pero mas daghan kaayo ang nadisgrasya kay wala magpabakuna.

Ako mismo, sanglit daghag sakit, wala dayon magpa-inject. Pero dihang mikonsulta ko sa akong doktor ug siya miingon: “Definitely, vaccine is okay for you,” nangita gilayon kog vaccination site nga puwede ra walk-in senior, maindyeksonan! Ug saludo ko sa Cebu Ayala Center Resbakuna site, kay mapinaggaon kaayo tanang front liner, kinsa, miasikaso nako.

Ning panahon sa pandemiya, magpabakuna ka man o dili, wala gyoy makalikay sa kamatayon. Pero mas maayo mamatay nga nagpabakuna kay sa namatay nga wala magpabakuna.

Gani, ang mga Katolikong simbahan pirmeng nag-ampo sa Ginoo nga unta giyahan ang kamot sa mga maalamon pagkaplag og medisina nga makahunong niining corona virus.

Ug ania, miabot na ang bakuna sa kinabuhi nga atong gipangayo gikan Kaniya. Bulahan ang mituo ug modawat niini kay maangkon sa hingpit ang kaluwasan. Kana, kon dili lang lawas ang bakunahan. Kondili, hasta sab ang masakitong kalag.