EDITORYAL - Kinsay tag-iya sa Carbon?

Ang Carbon Public Market makonsiderar nga maoy labing aktibo ug sentro sa kalihokan sa ekonomiya sa siyudad sa Sugbu. Daghan ang mga nabuhi tungod niini.

Apan sa pagdagan sa panahon, sa pagilis-ilis og mga mayores sa dakbayan, pipila ra man ang nakahatag og atensiyon niini.

Dunay mga gihimong kausaban sa pasilidad ug pagdumala apan sa gihapon nagpabiling hugaw.

Nahimo pang salag sa pipila ka mga mapahimuslanong kapitalista ang lugar.Panahon na tingaling usbon ang sistema.

Apan mahimo lang kini pinaagi sa pagpakig-alayon sa lokal nga kagamhanan ngadto sa pribadong mga korporasyon kun gusto gyud og kausaban ug kalamboan ang tanan.

Maayong paminawon ang isi'g ka habig ilabi na kadtong mga apektadong mga hingtungdan ug mga nalambigit nga partido.

Dili maayong sagolan og pamolitika o interes sa pipila lang ka tawo kondili ang tingog gyud sa mga vendors ug ang tingog sa siyudad nga maoy representante sa katawhan.

Una sa tanan, hugaw, samok kaayo ang traffic, naa na naglatag sa aseras ug sa mismong dalan ang mga vendors ug daghan pang kinahanglang usbon o ayohon.

Dili ba mas nindot kun hapsay ang tanan? Kaning mga problemaha dunay mga solusyon apan kinahanglang mokooperar ang tanan ug dili magpadala sa mga sulsol aron dili magkagubot.

Tan-awon ug tun-an og maayo ang mga rekomendasyon ug mga sugyot sa mas dunay kahibalo o eksperto ug dili ni bisan kinsa lang ilabi kun kini gikan sa pipila lang ka indibidwal nga dunay personal nga interes sa Carbon.

Mas maayong ang kalamboan sa tanang nanginabuhi ug kaharuhay sa mga mangomprahay sa maong merkado maoy sentro sa paghimo sa desisyon.

Wala man tingali vendors nga mosupak sa kalamboan nga mahitabo sa ilang panginabuhi diha sa maong merkado. Dili man tingali makiangayon para sa gagmay'ng vendors nga magbilin sila sa kasamtangan nilang sitwasyon ug dili nalang gyud moasenso?

Ang Carbon Public Market dili iya sa mga ambulant vendors, sa mga tenants, sa LGU, ug ni bisan kinsa pang indibidwal kay iya kini sa mga Sugbuanon.