Daw nag-lana'g potot

Gitugotan na sa Department of Trade and Industry (DTI) ang pagpasaka sa presyo sa mga palaliton, sama sa sardinas, gatas, kape, sabon ug uban’g de lata, ubos sa bag-o niining gipagawas nga suggested retail price (SRP) list.  Taliwala sa pagsaway, namahayag ang DTI nga sukad pa sa Septyembre 2019 ang katapusang pagsaka sa presyo.  Inay luwason sa kalisod, mora’g giduot na man hinoon sa kagamhanan ang katawhan ni’ng kalakiha. Mao na’y giingon sa katigulangan, “Kon bulay-og ang nagdala sa pamunoan, ayaw paabuta nga matunhay ang imong kahimtang. Sama ka ra nga naglana og potot”.  Saoonz!

Dili mokiay ni mo-igwad

Nagkauyon ang DOH ug ang World Health Organization (WHO) nga dili pa panahon nga ipatuman ang konsepto sa “vaccine bubbles” diin tugotan kadtong mga nabakunahan na sa pagsulod na sa mga malls ug restaurants kay padayon pa gihapon ang hulga sa pagtakod sa virus.  Ni’ng pagsalindot sa DOH sa maong sugyot, padayon usab ang pag-lusnô sa atong ekonomiya.  Bisan balik-balikon pa nato pag-awit ang “Tiny Bubbles” unya sumpayan pa sa awit nga “Pearly Shells”, dili kini makapa-kiay sa hawak ug makapa-igwad sa sampot sa taga-DOH aron matu-is unta ang maong hukom.  Puyo lang una!

Sipyat gani ang kabaw

Mipalabang ang Kongreso og balaodnon nga nagpa-lingkawas sa bayranan sa buhis sa mga medical oxygen lakip na ang paghimo, pag-import ug pag-donar sa maong mga medical supplies.  Sagad hangopon sa katawhan ang maong matang sa balaodnon.  Apan ni’ng higayona, daw nasipyat ug wala matumbok sa Kongreso ang suliran.  Didto sa pribadong hospital ang bugno sa bayronon tali sa pasyente ug sa tagdumala ug dili sa mga tindahan sa oxygen ug medical supplies.  Mao na’y giingon nga,”Masipyat man gani ang kabaw nga upat tiil, tawo pa kaha! Madahaan!

 Kabulay-og ang hinungdan

Mipadayag ang DOH nga nakigtambayayong sila sa IATF ug DTI aron mapaubsan na ang presyo sa RT-PCR Test nga sa pagka-karon, mokabat sa P3,800 ngadto sa 5 mil matag testing.  Daghan ang komento nga gawas sa ka-mahal, anomaloso pa gayod ang resulta sa RT-PCR Test.  Apan walay mahimo ang katawhan kay reglamento man busa, “duko na lang og pa-awot”.   Tambag pa sa mga katiguwangan, “Dili na lang nato butangan og malisya ang kapalpakan sa kagamhanan kon tataw nga pagka-bulay-og sa namunoan ang hinungdan”.  Fezteleern!

COVID-19-inspired nga ngalan

Gikataho nga duha ka nagmabdos nga mga inahan nga positibo sa COVID-19 nanganak sulod sa Barangay Isolation Center (BIC) sa dakbayan sa Sugbo niadtong Agosto 30, 2021.  Nasayran usab nga ang mga BIC napuy-an na sa 20 ka mga mabdos nga pasyente diin 17 na niini ang nahimugsoan.  Tungod sa kahimtang sa ilang pagpanganak, misugyot ang akong higala ni’ng mosunod nga pangalan alang sa ilang anak: Covid, Corona, Ko’rona Vyress, Lockdown, Covid Bryant, Covid Rose, Cuviduvidapdap, Quarantina, Kovvy, Sanitizer ug uban pa.  Pili na!