Alegreha lagi

Kaalegre sa politika dinhi sa Cebu City kay ang mga politikanhong grupo wa pa gyud makahuman pagpili kon kinsa ang ilang padaganon sa lainlaing pwesto.

Unsaon, dunay mga politiko nga kauban ra unta og grupo apan wa sila’y maayong pagsinabtanay ug resulta, hayan magkaatbang na hinoon sila sa eleksyon.

Dinhi sa Cebu City wa pa’y klaro kon makig-tandem ba gyud si Vice Mayor Michael Rama kang Konsehal Raymond Garcia pagdagan pagka mayor ug bise mayor.

Gusto kuno ni Rama nga ang iyang ikatandem mao si Konsehal Dondon Hontiveros, apan gihulagway sa uban nga kuwang pa’g kasinatian ang basketbolista alang sa pagka bise mayor.

Kon dili gani makadawat si Rama kang Raymond, giingnan ko sa akong amigo nga mapugos sila pagbuwag ni Rama ug aghaton nila si MCWD Chairman Joey Daluz III nga modagan pagka mayor, ug si Raymond ang bise.

Samot na kon modagan si Davao City Mayor Sara Duterte pagka presidente, ug si Daluz ang padaganon nga mayor sa Cebu City ubos sa ilang grupo, tingali dili gyud makabalibad si Daluz.

Angay unta nga sila maghiusa aron nga ang botos para kang Rama ug Daluz matibook batok sa kandidato sa BOPK. Apan ang BOPK naproblema sab. Ngano man?

Ang gihugonhugon nga padaganon pagka mayor sa BOPK mao si South District Congressman Rodrigo Abellanosa, apan ang tabitabi mao nga dili kaayo sila suod ug si Konsehal Franklin Ong.

Matud pa nga gusto ni Franklin Ong nga modagan pagka bise mayor kon si kanhi mayor Tomas Osmeña ang modagan balik og pagka mayor.

Unya, pananglit si Osmeña modagan balik pagka mayor, unya dili niya kuhaon si Franklin Ong nga maoy iyang bise kay si Abellanosa ang iyang palabihon, mahiubos si Franklin.

Kon di Franklin sab ang pilion ni Osmeña nga iyang bise, asa man sab ibutang si Abellanosa? Nahuman na ang iyang tulo ka termino bali’g siyam ka tuig pagka kongresista.

Aw, pwede man hinoon nga molansar siya pagka konsehal sa Cebu City ug bisan pa’g matulog siya, sigurado nga daog, apan mas ubos ra nga katungdanan.

Pagka kongresista sa Cebu City north district, nakadungog ko nga si Cutie Del Mar anha man diay sa han-ay ni Inday Sara.

Unya si kanhi konsehal Mary Ann Delos Santos maoy padaganon sa BOPK, ug si Konsehal Niña Mabatid sa grupo nila ni mayor Edgar Labella sa PDP.

Ang bintaha ni Cutie kay ang iyang apilyedo kay sikat man kaayo ang iyang amahan, apan lupig siya sa mga pakulo ni Mabatid, samtang si MaryAnn, naghilom-hilom pa.

Mao na ang dagan karon sa politika dinhi sa Cebu City.