Voluntary resignation

Niadtong tuig 2019 pang girekomendar sa Presidential Anti-Corruption Commission (PACC) ngadto ni Pres. Rodrigo Roa Duterte ang pagpataktak ni Francisco Duque III sa puwesto isip Secretary sa Department of Health dihang base sa ilang halawom nga pangdukiduki, nasayran nga ang building gigamit ug gipaabangan aron maoy himoong Philhealth Regional Office sa Pangasinan, gipanag-iya diay sa pamilyang Duque.

Isip dakong opisyal sa gobiyerno, si Duque nakalapas sa atong Republic Act 6713: ‘Code of Conduct and Ethical Standards for public officials and employees’ ug usab sa RA 3019, Section 3: ‘Anti-Graft and Corrupt Practices Act’.

Sa report nga gisumiter sa PACC ngadto sa Malakanyang ug didto sa Ombudsman, ilang giladlad ang kalambigitan ni Duque sa maong kaso, apan hugtanon kining gihimakak sa Health secretary. Suwerte si Duque, kay nagpabilin siyang malinis sa panan-aw ni Duterte. Ug ang bug-at rekomendasiyon sa PACC wala makadulot kaniya.

Niining bag-o, gipublikar sa Commission on Audit (COA) ang ilang nasindolang iregularidad nga paggasto sa DOH sa 2020 P67.32 bilyon budget ug sa wala paggamit sa P11.89 bilyon nga pundo.

Hinuon, gihatagag 60 ka adlaw ang DOH pagsumiter sa maong mga nawalang papeles nga makatapak sa daghang buslot nga nakit-an sa COA diha sa ilang makuting pag-audit. Pagtubag sa naasoyng audit findings gikan sa DOH mao ray tumong sa COA.

Pero, gilain sa pagsabot ni Duque. Matud niya, gisakitan-naulawan kaayo siya sa gihimo sa COA. Kay makaumol lang kinig dautang impresiyon gikan sa katawhan bahin sa iyang pagkatawo nga tingale, si Duterte ray nakadayeg.

Gumikan sa nahisgotang audit findings, misamot kabanha ang panawagan sa katawhan, nga paresayinon na si Duque.

Samot na, nga ning pipila ka adlaw nga milabay, sa atubangan ni Duque, gipahibalo ni Duterte ang usa ka salabtonong mensahe: Nga never, moawhag siya ni Duque nga moresayin. Perog motunol og voluntary resignation si Duque, aw, dawaton niya!

Kahinumdoman, si Duque pirmeng mipasiatab. Nga kadaghan na siya mo-attempt sa pagresayin, apan gisalikway ni Duterte. Nan, karon, nga modawat na si Duterte niini, unsa pa bay gipaabot ni Duque?

Nadungog ba niya ang nagakakusog singgit sa mga OFWs ug ROFs? “Please, Duque, resign! Not only voluntarily. But, irrevocably!”  Unta, madutlan si Duque ning ilang panawagan.