Hagit sa kapolisan

Ambot og masulbad ba kaha sa kapolisan kining laing pagpamusil didto sa Good Shepherd, Banawa, Guadalupe nga mibiktima og usa ka abogado kaniadtong Huwebes.

Daghan na nga pagpamusil dinhi sa Cebu City nga ang kapolisan nagtukod dayon og task force kay paspasan kuno nila sa pag-imbestigar aron nga mailhan ug madakpan ang kriminal.

Sama gud sa pagpamusil nga ang biktima si radio commentator Rey Cortes nga hangtud karon wa gyud mahatagi og kasulbaran sa atong kapolisan.

Gawas sa kaso ni Rey Cortes, duna pay daghan kaayong krimen nga wa gyud masulbad sa kapolisan kay wa gyud tutoki pag-ayo sa mga imbestigador.

Mao nga ang katawhan usahay, modayeg sa mga sakop sa National Bureau of Investigation (NBI) kay maayo man mo-imbestigar.

Ako nagtuo nga ang kapolisan dunay mga banggiitang imbestigador, apan ang problema lang kay dili sila maninguha pag-ayo aron pagsulbad sa krimen.

Karon, kining pagpusil ug pagpatay ni Atty. Rex Fernandez, nga nakuhaan gani og footage sa CCTV, ambot og masulbad ba kaha ni sa mga polis.

* * *

Sa miagi ko nga lindog dinhi sa Banat News, naghisgot ko sa water project sa MCWD nga ang tubig gikan sa Barangay Lusaran, dad-on dinhi sa Cebu City supay sa 30 kilometros nga dagkong tubo.

May tulo ka text messages nga akong nadawat nga nangutana kon dili ba mosaka ang prisyo sa bayranan sa tubig, ilabi na niadtong taga “upland areas” nga maoy gitumong nga makabenepisyo niini nga proyekto?

Gipangutana nako si MCWD Chairman Joey Daluz III kabahin niini ug gipasabot ni Daluz nga tinuod, mahal ang pagpalit nila sa tubig gikan sa pribadong kontraktor nga modala sa tubig diha sa Barangay Busay.

Tag P65 ang palit nila kada cubic meter (lima ka baril) apan gipasalig ni Atty. Daluz nga sulod sa tulo ka tuig gikan sa pag-agas sa tubig, way umento sa bayranan.

Tingali, human sa tulo ka tuig, basin dunay gamay’ng adjustment sa prisyo, apan gamay ra usab kaayo ug dili ingon sa kantidad sa ilang pagpalit.

Gituyo ko kini pagsuwat dinhi kay daghang tigbasa og Banat News sa mga driver og habal-habal nga kada adlaw gyud nagbasa og Banat News atubangan sa barangay hall sa Busay.

Ayaw mo kabalaka. Ang kontraktor sa MCWD pagdala sa tubig gikan sa Lusaran paingon diha sa Busay, miingon nga ilang paagason ang tubig mga buwan sa Mayo karong sunod tuig.

Nagpasabot kini nga daghan na nga tubig alang sa mga nagpuyo sa upland barangay sa Busay, Lahug, Banilad ug Apas, ug walo ka barangay nga maagian sa linya.