Cramp sa champ

Sa mga nangaging away ni eight-division world champion Manny Pacquiao, dinhay higayon sa iyang away ibabaw sa ring nga ang iyang mga paa nakasinati’g cramp.  Hinungdan, nga ang kapaspas sa iyang naandang foot works, naapektohan.

Maayo na lang, kay niadtong panahona, batan-on pa siya ug nasalida gihapon ang kahinayaw sa iyang mga tiil. Dili sama sa ilang engkuwentro ni Yordenis Ugas nga bag-o lang nasaksihan sa tibuok kalibotan, diin si Manny 42 anyos na.

Unya, didto pa lang gani sa ilang locker room, gihilothilot na pag-ayo sa conditioning staff ang mga paa ug batiis ni Manny nga morag adunay deperensiya. Si Assistant Coach Buboy Fernandez, kinsa diha sa kilid, maobserbaran nga morag adunay kahingawa samtang nagsud-ong sa kahimtang ni Manny. 

“Patay, misugmat man kaha ang legs cramp ni Manny? Delikado siya ni Ugas ining kombatiha, da!” Akong hinanaling reaksiyon pagkakita ko sa maong eksena pinaagi sa live video on line. Tuod man, natinuod akong gikahadlokan. Ang kapaspas sa naandang foot works ni Manny nahanaw dihang nagbinakbakay na sila ni Yordenis ibabaw sa ring,

Ang kaidlas sa mga tiil ni Manny nga dali rang makasulod-gawas sa atubangan sa kontra ug otomatik nga makabalhig anggulo asa mopuwesto aron dili makabawos ang kaparang human niya paulanig sagunson nga mga solidong kumo, wala na masaksihi sa tanang nanan-aw.

Tapos gideklarar ang mananaog, si Manny mapaubsanong miangkon sa iyang kapildehan. Mitug-an nga gihugpaan og cramp and duha niya ka paa. Ug kini nagsugod sa ikaduhang rawon hangtod sa ika-dose.

Hinungdan, nga naglisod siya sa paglihoklihok balhin niini sa nagkalainlaing dapit nga gusto niyang puwestohan.

“To my fans, I’m sorry that we lost tonight. I really tried my best but my best is no longer good enough.” Pasalamat-pasabot niya sa minilyong lunod-patay niyang boxing fans. Kinasingkasing gi-congratulate ni Manny si Yordenis sa naangkong kadaogan ug sa gipakita niining maisogong pagpakigbinakbakay.

Mosamot pa unta ang mahatag nilang exciting action moments ngadto sa tanang fans kon wala pa atakiha sa cramp ang duha ka legs sa eight-division world champ, kang kansang kabantog matupngan man tingale, pero dili malabwan.

Mao nga bisag pilde si Manny, ang tibuok uniberso misaludo gihapon kaniya.