Absolute divorce: uyon ka?

Giuyonan sa committee level sa Ubos Bay Balauranan ang Absolute Divorce Bill. Tungod niini, ipresentar ug lantugian na sa kinatibukang sakop sa Ubos Bay Balauranan ang balaudnon.

Gikondinar sa Catholic Bishop Conference of the Philippines ang gihimo sa Committee on Population and Family Relations ug gihulagway nga makaalarma kini tungod kay inay palig-onon ang pamilya, gipahinay hinuon nila kini.

Ang mga sukaranan sa gitugot nga legal separation, annulment of marriage ug nullification of marriage basi sa psychological incapacity ubos sa Family Code ang gilakip sa mga basihanan alang sa pagsang-at sa Absolute Divorce BIll.

Gilakip usab sa balaudnon kining dugang mga sukaranan: panagbulag sulod sa lima ka tuig sa panahon nga gisang-at ang Absolute Divorce, kun ang bana o asawa mipaubos sa gender reassignment nga operasyon o nahimong bayot o tomboy, dili na mauli nga panagbangi sa magtiayon, ubang klase sa abuso sulod sa kaminyoon, balido nga diborsiyo mga nakuha sa gawas sa nasud sa langyaw o Pinoy nga bana o asawa ug kaminyoon nga gipakawalay bili sa giilang hukmanan sa mga relihiyosong grupo.

Kining mosunod mao ang mga basihanan sa pagsang-at og kasong legal separation ubos sa Section 55 sa Family Code: kanunay nga pagpanapat ug grabing abuso batok sa reklamante, ilang bata o bata sa reklamante; pagpanapat o moral pressure sa pagpugos pagbalhin og tinuohan o pagpasakop sa kahugpongang politikal; pagsuway sa gireklamo pagkorap o pagtukmod sa reklamante, ilang bata o iyang bata sa pagsulod sa prostitusyon; pinal nga hukom nga nagpapriso sa gireklamo og sobra sa unom ka tuig bisan pa og gipasaylo; pagka adik ug pagka palahubog aa gireklamo; pagka bayot ug pagka tomboy sa gireklamo; pagsulod og bigamous nga kaminyoon sa gireklamo sa sulod o gawas sa nasud; pangabit o  perversion; pagsuway sa pagpatay sa gireklamo sa nagreklamo; pagabandonar sa nagreklamo; o pagabandonar sa reklamante sa walay igong rason og sobra usa ka tuig. Ang buot ipasabot sa bata mao kadtong iya gayod sa ginikanan o sinagop. Sumpayan pa…     

* * *

Happy 5th birthday to Sofia Cavan Tabada nga nagsaulog sa iyang adlaw’ng natawhan karong adlawa gikan sa imo Papa Totong, Mama Langlang, Brother Adrian ug Sister Lyka.