Dili katuohan ang saad

Tungod sa awhag sa kadagkoan sa partido’ng PDP Laban, mideklarar na si Presidente Duterte nga modagan pagka-bise presidente karong Eleksyon 2022.  Buot sa Presidente nga mapadayon ang iyang krusada batok sa ilegal nga drugas, insurgency ug kriminalidad.  Kulang ang unom ka tuig nga termino kon ang katuyoan mao ang pagpangalagad.  Apan kon ang katuyoan mao ang padayon nga paghupot sa gahom, kulang bisan pa ang tibuok kinabuhi.  Matud pa bitaw sa panultihon, “Walay kapuslanan nga paninglan ang tawo sa iyang gipangsaad samtang siya nahigugma, nahubog o ba kaha modagan og posisyon sa kagamhanan.  Mao ba!

 Ilisan sama sa diaper

Gihulagway sa oposisyong pundok nga 1Sambayan nga pagbugalbugal sa Konstitusyon ug sa demokratikanhong proseso ang pagdagan unya ni Presidente Duterte isip bise presidente karong Elesksyon 2022.  Dugang pa sa oposisyon, nahadlok ang Presidente nga paninglan sa iyang mga kasaypanan.  Mapagaw na lang ang oposisyon sa pagpanaway apan daw dili na kapugngan si Presidente Duterte.  Anaa na sa katawhan ang gahum kon kinsa ang suportahan. Angayan lang i-silsil sa panumduman sa tawo ang panultihon nga, “Ang politiko ug ang diaper angayan’g ilisan kanunay ug sa managsamang hinungdan.”  Baya no!

Giduphan si Duque

Namulong si Presidente Duterte nga mahimo niyang dawaton kon ugaling motanyag si DOH Secretary Duque sa iyang resignation apan dili mahitabo nga iya mismo’ng palagputon sa pwesto ang kalihim, Alang sa Presidente, mahimo lamang niyang palagputon si Duque kon mapamatud-an nga kini corrupt.  Luyo sa makabungog nga awhag sa katawhan sa pagdemetir, ang padayon nga pagkuwabid ni Sec. Duque sa katungdanan makapa-usab na sa politikanhong sangyaw nga “Public Office is a Public Trust”.  Hinonoa, nahimo na kini’ng “Public Office is a Public Graft”.  Pagkatoytoy!

Wala’y kapaingnan

Gumikan sa mga ekonomikanhong suliran nga hatud sa nagpadayon’g pandemiya, daghang mga estudyante ug magtutudlo gikan sa mga pribadong institusyon ang mibalhin na sa mga publikong tulonghaan. Tataw kaayo nga sa panahon sa kalisdanan, ang gobyerno lang gyud ang bugtong kadangpan sa katawhan. Maoy hinungdan nga gihangop ang 4Ps ug tanang matang sa ayuda. Matud pa sa akong amigo, “Molayas unta ko kay di na ko ka-agwanta ni’ng kahimtanga ug niining lugara, apan unsaon man nga wala man ko’y laing kapaingnan”.  Fezteleern!

Tanod ang bisita

Usa sa mga protocols nga giimplementar sa lungsod sa San Remegio, Cebu mao ang pagkuha’g barangay clearance niadtong mopahigayon og mga selebrasyon sama sa birthday, kasal ug uban pa labi na gayod kon adunay mga dinapit ang maong kasaulogan. Adunay mga kapolisan, ug barangay tanod nga mosusi kon mituman ba sa lagda ang nagpahigayon sa selebrasyon.  Kinaiya baya nato ang pagka-maabi-abihon busa segurado’ng agdahon usab ang mga tanod ug kapolisan nga magsusi.  Basin baya mas daghan pa ang barangay tanod nga mokaon sa kumbira kay sa gi-imbitar nga bisita. Hala no!