Gukda gyud ninyo

Bisan pa og gipasaylo na sa tricyle driver ang tawo nga misuntok kaniya ug nagpailang sakop siya sa National Bureau of Investigation, apan angay gyud nga ang NBI mopursiger pag-ila kon kinsa ang maong tawo.

Abi ninyo og ngano? Giyama-yamaan sa maong tawo ang girespetohan pag-ayo nga law enforcement unit sa kagamhanan nga ubos sa Department of Justice (DOJ) kay magtoo ang publiko nga abusado NBI.

Ang NBI maoy counterpart sa Federal Bureau of Investigation (FBI) sa United States, mao nga kon ako pa maoy regional director sa NBI, gukdon gyud nako ang maong tawo bisan og gipasaylo na siya sa iyang gikulata.

Dili nato mapugos kadto si Marvin Lobitaña kay katungod niya kon magpadaugdaog ra siya, apan dili angay pasayloon ang pagpangangkon sa maong tawo nga misukmag kaniya nga nagpaila nga NBI, kon di man gyud siya sakop.

Pananglit sakop man siya sa NBI, aw mosamot nga angay siyang silotan kay nanagmal siya’g tawo ug nakuhaan kini og video nga nakita sa katawhan.

Dakong sayop kon dili gukdon sa NBI ang maong tawo, kay mahulog man nga nahadlok sila niini kay dunay report nga sakop diay kini sa iladong banay.

Busa, kinahanglan gyud nga ilhon sa NBI ang maong tawo ug sugdan ang paghan-ay sa mga dukomento pagpasaka og kaso batok kaniya.

* * *

Gipul-an na ko pagsige’g balikbalik pag-awhag sa katawhan nga moabag kita aron mokunhod ang gidaghanon sa matakboyan og Covid, ilabi na dinhi sa Cebu City.

Daghan gihapon sa mga tawo ang way pagpakabana, ug gani, bisan og way kapuslanan ang ilang mga lakaw, nanggawas gyud sa ilag kabalayan.

Ang uban nagsige og suroysuroy nga mora’g wa na’y kahadlok nga matakdan sa virus. Ang statistics sa Department of Health (DOH) dinhi sa Cebu City kaniadtong Martes, dunay 10 nga dugang namatay, ug 252 nga bag-ong natakdan.

Tungod niini, ang mga natakdan og COVID-19 nga aduna gyuy gipamati sa ilang kalawasan dinhi lang sa Cebu City miabot na og 4,588. Komedya pa ba gud na?

Ang nangamatay nga taga Cebu City sukad miigo ang COVID-19 sa nasud sukad niadtong Pebrero 2010, miabot na og 1,123.

Makita sa statistics sa DOH nga bisan sa mga silingan natong siyudad, duna gyuy pagsaka sa gidaghanon sa mga kaso sa COVID-19.

Daghan na nga mga trabahoan nga nanirado ug nanaktak og mga empleyado, gusto ba kamo nga mosamot kita karabanit.

Nganong sa ubang mga nasud wa na man sila’y mga kaso? Kay estrikto man sila nga mipatuman sa balaod batok sa masinupakon, ug tungod niini nangahadlok ang ilang katawhan  paggawas sa kabalayan, hinungdan nga takulahaw lang nangahanaw ang virus.