Padayon ang serbisyo

Dakong adlaw karon alang sa Sugbo, sa mga Sugboanon, ug sa tanang mahigugmaong sa pinulongang Bisaya. Kini gumikan kay sa makausa pa saulogon sa Banat News ang ika-27 nga anibersaryo sa pagkahimugso niini.

Hapit na diay tulo ka dekada sukad migawas unang isyu sa Banat News sa Sugbo, Kabisayaan ug Mindanao. Sukad niadto, wala na gayud mihunong pa ang maong pamantalaan sa tulin nga paglupad niini.

Ang kaniadto eksperimento lamang sa mga nagpaluyo ug mga stakeholder niini karon nahimo nang nag-una ug kasaligan sa natad sa pagsabwag og balita ug inpormasyon ngadto sa katawhan dinhi sa Sugbo ug ubang mga lugar.

Ang kalamposan sa Banat News nagpasabot lamang sa walay puas nga paghigugma sa mga Sugboanon sa ilang kaugalingong kultura. Sa ilang padayon nga pagbasa niini, atong makita nga padayon usab silang nahigugma sa ilang kaugalingong pinulongan.

Tungod niini, dako among pasalamat sa among mga magbabasa, advertiser ug ubang mga stakeholder gumikan sa ilang walay hunong nga suporta sa Banat News gikan sa unang isyu niini hangtud niining panahona.

Niining pagsulbong sa teknolohiya, mikuyanap usab social media. Apan taliwala niining maong kalamboan, gihulga usab kita sa mga fake news ug ubang kwestiyonableng mga inpormasyon nga naghatag ug kabalaka sa katawhan.

Hinuon makasalig ang among mga magbabasa nga padayong mopadayag ang Banat News sa kamatuoran pinaagi sa kanunay nga pagpublikar sa tinuod ug maayong mga balita ug inpormasyon. Kini isip pagtamod sa ligdong nga pagserbisyo sa katawhan.

Makapaabot ang mga Sugboanon ug ang katawhang Pilipinhon sa dugang dedikasyon sa Banat News paghatod og tinud-anay nga serbisyo. Kini isip kabahin sa among misyon pagtabang sa paningkamot alang sa nasudnong kalamboan.