Nagkaduol nga climax naputol

Kutob sa unsay hilig sa tawo nga kalingawan, kon kini makahatag og katagbawan sa gipangandoy niyang kalipay, bisag unsa pa kini kamahal, iyaha gyong paliton.

Ug mao kini ang nahitabo sa minilyong boxing fans sa tibuok kalibotan, kinsa gustong mosaksi sa umaabot away nila ni Eight World Division champion Manny ‘Pacman’ Pacquiao ug unified WBC and IBF welterweight champion Errol ‘The Truth’ Spence Jr. didto sa T-Mobile arena, Las Vegas, Nevada, USA inig ka Agosto 21 (Agosto 22, adlawng Domingo dinhi sa atoa).

Gimingaw na sila niadtong mga eksena, diin matag lupad sa mga suntok ni Pacman, morag tuslokon og dagom ilang sampot tungod sa kakulba ug kahinam sa higayon nga motugpa ang mga solidong kumo niini ngadto sa apapangig sa kontra.

Ug maglumbaanay pagsiyagit nga nagpanangpit sa ngalan ni Manny.

Namatud-an nang usa ka very exciting fighter si Manny. Kon asa ipahigayon ang iyang away, modugok-dagsa ang daghang tawo gikan sa nagkalainlaing nasud.

Ang mga tindahang taudtaod nang gisirhan, kalit lang mobukas. Ug ang mga hotel nga nagmingaw, mabuhi-malipay usab.

Busa, dili kahibudngan. Nga kusog kaayo ang halin sa Pacquiao-Spence fight tickets bisag kini may pagkamahal.

Segun sa usa ka tinubdan, ang ring side ticket mibalor nag $40T, o P2M sa atong kuwarta.

Pero gipalit gihapon sa mga adunahang na-thrill na kaayong mosaksi sa maong payit, diin ingkasog si Manny ang modaug, dili lang siya ilhong greatest of all times. Kondili, the best of all the bests all over the world.

Pero, naunsa ba? Usa ka semana kapin na lang unta ang paaboton, miatras man hinuon si Spence? Kay kuno naay gisi iyang retina ug kinahanglan, matud pa sa iyang mga doktor, nga maoperahan dayon.

Tanang nakapalit og tiket, nahugno, uy! Lalim bay, nagakaduol na unta ang adlaw nga ilang masinati ang gikahinamang climax sa panagkombati nila ni Errol ug Manny, kalit lang kining giputol ni Errol?

Gumikan niini, nangguho daghang negatibong reaksiyon.

May nagduda nga hadlok ang mga Amerikano nga usa ka Pinoy ang ilhong hari sa tanang hari sa natad sa pamoksing tibuok uniberso.

Busa sa hilom, nangita silag paaging legal aron kini mapugngan.

Unta, ang maong pagduda, dili matinuod.