EDITORYAL-Maayong imbestigahan ang DOH

Taas-taas nga eksplinasyon ang gikinahanglan ni Health Secretary Francisco Duque III bahin aning matud pa mga nakitang mga pagkulang sa Commission on Audit sa gastos sa iyang departamento nga moabot og P67.32 bilyones sa pundong gigamit alang sa pagatubang sa pandemiya sa miagiing tuig.

Nakita sa state auditors nga ang P66.28 bilyones niini nakitaan og deperensiya tungod sa "non-compliance of pertinent laws and rules and regulations."

Hinuon si Duque namahayag nga tanang nakitang kakulangon sa paggastos sap undo gitarong paggamit ug mipasalig siya nga tanang kwartang gigahin para sa pagpalit og mga gamit sa DOH sama sa test kits, PPEs, benepisyo ug sweldo sa mga healthcare workers ug uban pa kompleto og dokumento. Hinumdomi, si Duque gikastigo na og pagsaway sa mayoriya sa mga senador sa miaging tuig tungod sa gihulagway nilang walay-ayo niining pagdala sa Covid-19 response sa nasud.

Gibasol siya u gang iyang departamento kun nganong daghang mga medical frontliners ang nangasakit ug daghan ang nangamatay. Unang nakitang kakuwangon sa miaging tuig mao ang PPEs nga proteksyon sa mga frontliners, mga ventilators alang sa mga pasyente ug uban pa. Si Duque sab maoy gibasol sa mga senador kaniadto nganong nalangay ang Pilipinas pagpalit og bakuna kontra Covid-19, ug karon nigawas kining maong COA report nga nakapasamot sa kayugot sa mga magbabalaod.

Kadtong maong mga gamit nga nalangay pagpalit miresulta kadto sa kamatayon sa pipila ka mga pasyente nga nagtinga na diha sa mga tambalanan.

Kini bisan paman og naa nay pundong gipagawas alang sa dinaliang pagpalit og mga gikinahanglang gamit sa mga tambalanan. Mas maayo tingaling adunay himuong Senate inquiry bahin niini. Tungod kay dako kining kwarta sa katawhan ang gihisgotan ug posibleng tungod sa kalangay ug ka dili epektibo sa trabaho maoy hinungdan nga daghang kinabuhi ang nakalas

Maayo sab nga klaruhon ang sunod nga budget allocation sa DOH karong tuig 2022 kung unsay gamitan aron dili na kini masubli pa.

Daghang mga yanong Pilipino ang posible pang matakboyan og Covid-19 nga nagsalig sa maong tabang gikan sa gobiyerno aron makalahutay.