EDITORYAL - Idlas nga bulawan

Nagmaya ang kapin sa 100 milyones ka mga Pilipino tungod kay sa unang higayon sukad miapil ang Pilipinas sa Olympics 97 ka tuig na ang nilabay nakakuha kini og bulawang medalya.

Nadakpan ra gyud kining idlas kaayong bulawang medalya pinaagi sa garbo sa Pilipinas sa weightlifting nga si Hidilyn Diaz sa 55kg category.

Tungod sa kahinam sa mga tawo, bisan gani ang duha ka oras ug kwarentay-singko minutos nga kataposang state of the nation address (SONA) ni Pres. Rodrigo Duterte nga mas sayo pang nahuman niadtong adlaw nga Lunes, nasapawan sa kadaugan ni Diaz.

Ang Olympic gold medal dili sayon kuhaon sa mga labing banggiitang atleta. Samot na kung gikan sila sa mga gagmay ug dili kwartahang nasud sama sa Pilipinas. Dili sama sa Amerika, Russia, China ug uban pang dagko, adunahan ug dunay dagkong populasyon, lisod makakaplag og mga de kalibre ug talentadong mga atleta.

Kun duna man, anha nasab nabiyaan ang mga atletang Pinoy sa training, kalidad sa mga coach, moderno ug haom nga mga sports training centers ug labaw sa tanan pinansiyal nga suporta gikan sa gobiyerno.

Pipila sa atong mga atleta, apil na si Diaz, gitabangan ug gisuportahan og mga pribadong sektor nga gitawag nilang 'sponsors' aron makakuha og de kalidad nga trainings.

Diri dapita nangiwit ang gobiyerno sa Pilipinas sa pagpalambo sa mga atletang Pilipino. Mao unta kini ang hatagan og atensiyon sa mga naglingkod sa posisyon. Ang kalamposan ni Diaz produkto sa sakripisyo ug pag-antos nga iyang giagian.

Dili lamang si Diaz ang nakasinati niini kondili halos tanang mga atletang Pilipino nga hangtud karon nakatutok ang determinasyon ug dedikasyon aron mohatag og dakong dungog sa Pilipinas.

Maayong sumbanan sa ubang atleta si Diaz. Nga bisan pa sa nangiwit nga sistema, mahimo diay makuha ang bulawang medalya.