Epicenter na sab ang Cebu City
Ang pagsalikway sa Department of Health (DOH) sa rekomendasyon sa OCTA Research sa pagpahamtang sa mas higpit nga mga lagda sama sa regional o local lockdowns sa Metro Manila ug Metro Cebu maoy laing timaan nga wa sila kasabot sa mga implikasyon sa ilang kaugalingong mga numero.
Kay opisyal nga mga numero sa DOH ang gibasehan sa OCTA sa ilang pasidaan nga makapa-alarma ang pagsulbong sa mga kaso sa duha ka sentro sa populasyon. Pero ang DOH niinsistir nga, sama sa naandan, magpaabot sila og mas taas nga mga numero una molihok.
* * *
Nauwawan hinuon ang DOH kay ang mga mayor sa Metro Manila niuyon sa OCTA ug nirekomendar nga pahugtang mga lagda sa ilang mga lugar. Wa maglangay ang Inter-Agency Task Force (IATF) sa pagsanong sa mga mayor. Ug giaprobahan dayon ni Presidente Duterte ang bag-ong mga lagda.
Maong gibalik dayon sa General Community Quarantine (GCQ) with heightened restrictions ang Metro Manila, Ilocos Norte, Ilocos Sur, Davao de Oro ug Davao del Norte. Wa i-apil ang Sugbo nga, segun sa DOH figures ug OCTA analysis, mas paspas ang tinakdanay.
* * *
Naalarma ang OCTA, ug maong niuyon dayon sa Malakanyang, kay ang reproduction number (gidaghanon sa matakdan sa matag positibo nga kaso) sa Metro Manila niburot ngadto sa 1.21 sa semana sa Hulyo 16-22 gikan sa 0.92 sa gisundang semana.
Pero mas makapa-alarma ang reproduction number sa tulo ka syudad sa Metro Cebu: Kinatas-an ang Mandaue City, 1.98; sunod ang Lapulapu City, 1.91; ug dayon ang Cebu City, 1.79.
* * *
Ang hubad sa OCTA sa mga numero, nga ambot nganong wa makit-i sa DOH ug sa Malakanyang (hinaot nga di tungod kay, sama sa kakaraanan bisan taga Mindanao na unta ang presidente, nagtuo sila nga ang Pilipinas adto ra magsugod ug matapos sa Metro Manila), nga ang matag pasyente nga mataptan sa Covid-19 sa Mandaue, Lapulapu ug Cebu City makatakod og dul-an sa duha.
Nga mas paspas nga nakapasulbong sa mga kaso dinhi.
Ug maoy hinungdan nganong ang Cebu City nahibalik sa iyang pagka epicenter sa Covid-19 sa tibuok Pilipinas kay nakarehistro sa kinatas-an nga average nga 151 ka kaso kada adlaw.
* * *
- Latest
