Nia nang Delta hagbay ra
Mas nilig-on ang pagduda nga nagsugod na lokal nga tinakdanay sa mas mananakod ug mas makamatay nga Delta variant sa kagaw nga nakaingon sa COVID-19 human gipahibawo sa Philippine Genome Center (PGC) nga dugang 12 ka kaso sa Delta variant nga wa makabiyahe sa gawas sa nasud.
Ang maayong balita mao nga way bisan usa sa 47 na ka kaso sa Delta variant nga naggikan sa Sugbo ug Central Visayas, ang kinadul-an maong magtiayon sa Baybay, Antique sa Western Visayas. Pero tungod sa limitasyon sa PGC di na sukaranan sa pagsaulog.
* * *
Usa sa kinadak-ang problema mao nga ang 12 ka bag-ong kaso sa Delta variant nga gipahibawo sa PGC gahapon gipasikad sa swab samples nga nakuha tulo ka semana na ang nilabay sama sa samples sa duha ka kaso sa Pandacan, Manila, o 50 ka adlaw ang nilabay sama sa samples sa magtiayon sa Antique.
Haskang lisora sa paghimo og mga lakang pag-alkontra sa panghitabo dul-an duha ka buwan nang nilabay. Labihang daghana nang nahitabo, mahimong mas daghan pang natakdan, samtang natanggong ang swab samples sa PGC sa nangaging mga semana.
* * *
Bugtong mahimo sa gobiyerno mao ang pag-angkon sa kahigayonan nga nakasugod na ang community transmission sa Delta variant, labi na sa mga lugar nga paspas ang pagsulbong sa bag-ong mga kaso, apil na sa Sugbo, Bohol, Negros Oriental ug Metro Manila.
Pero hinaot nga di sila kutob lang sa sulti. Angay'ng ipatuman ang mga rekomendasyon sa mga eksperto pagpatuman dayon sa lockdowns ug paghingusog sa pagpamakuna.
* * *
Kay di na mang kasugakod ang ekonomiya sa laing nasudnong lockdown, nirekomendar ang mga eksperto og lockdown ug mas daghang bakuna sa mga lugar nga labing daghan og bag-ong kaso, labi na sa Cebu City ug Metro Manila.
Hinaot nga di na ni lalisan og dugay. Epektibo ang lockdowns paglaslas sa mga kaso sa India ug Indonesia. Labi na nga gipanghatag daan sa ilang mga gobyerno ang ayuda sa labing naapiking katawhan wa pa hunongang mga negosyo. Ug hinaot nga tinuod ang ayuda--di masangit sa bolsa sa mga politika ug di ibanan para dolomite sa Manila Bay ug waldas sa pagsuruysuroy tibuok nasud pagpamintaha sa piniliay sunod tuig.
- Latest
