Labing sad-an ang sabaan

Mipasidaan si Senador Risa Hontiveros nga mahimong manghilabot ang China sa pagpahigayon unya sa eleksyon karon’g Mayo 2022 pinaagi sa cyber-espionage campaign sa tumong nga maangkon sa hingpit ang teritoryo sa West Philippine Sea.  Lakip sa pamaagi sa China ang pagseguro nga mapili ang lider nga dili mosupak sa ilang mga kagustohan. Kon tinuod, dili kaha maayo nga pandayon na daan sa senador ang mga balaodnon aron mapugngan ang gipanagan-an nga panghitabo?  Makapahinuklog usahay ang gipasabot sa panultihon nga “Ang labing sabâ-an nga propeta sa kaalautan, sagad maoy nagpas-an sa labing bug-at nga kasal-anan”.  Baya no!

Daw karaan nga aircon

Alang kang Bise Presidente Leni Robredo mas mahinungdanon ang pagtarong sa iyang gimbuhaton kay sa pagpataas sa iyang popularity rating, dugang ang pag-ingon nga ang paghatag importansya sa popularidad maoy labing insensitibo nga kinaiya labi na ni’ng panahon sa pandemya. Kon matinud-anon pa lang ang mga politiko sa ilang gipanumpaan’g katungdanan, hayan hamugaway na ang kahimtang nato’ng mga Pilipino.  Apan alang sa akong higala, ang mga politiko sa Pilipinas nahisama sa iyang karaan nga aircon: “Saba na kaayo apan dili na mogana ug wala na mo-function”.  Shalaaan ba!

Double standard ang hinungdan

Adunay nadawat nga taho ang DILG mahitungod sa mga dagkong panagtapok nga gipahigayon sa mga politiko taliwala sa pandemiya.  Apan igo lang mipasidaan si USec Densing nga kini’ng maong kalihokan mahimong hinungdan sa kusog nga pagkuyanap sa coronavirus ug wala siya mopahimangno sa mahimong silot sa tigpasiugda sa panagtapok.  Kon yano’ng tawo ang masakpan, kasabâ ug multa ang mahiaguman.  Apan kon dagko’ng politiko ang magkiat-kiat, pahimangno lang ang ipadangat. Ang double standard nga pagpatuman sa mga lagda maoy hinungdan nga padayon ang pagdagsang sa coronavirus.  Maypa’g molegeed!

Serbisyo mao’y importante

Gikompirma ni Senador Panfilo Lacson ang pagkumbuya nila ni Senador Tito Sotto isip kandidato sa pagka-presidente ug bise presidente karong Eleksyon 2022.  Nakab-ot nila ang maong hukom human sa ilang pagkonsulta sa mga lokal nga opisyales sa Luzon.  Niini’ng ilang pagkumbuya, adunay mga sugyot nga kumbinasyon sa ilang kanditura sama LAC-SOT or LAC-TO, nga minubo sa Lacson ug Sotto, ingon man PI-SOT, minubo sa Ping ug Sotto.  Dili hinuon igsapayan kon unsa ang pangalan; ang mahinungdanon mao ang abilidad ug kamatinud-anon sa pagpanglagad.  Bukal na ang kawa!

Nahigmata sa kompetensiya

Wagtangon na sa Philippine Postal Corporation (Post Office) ang notification cards isip kabahin sa ilang “Hatid Malasakit” program sa tuyô nga mapadali ang pagpanghatud sa mga sulat ug parcels alang usab sa kasayon sa publiko. Sa kanhiay, ang padalhan maoy mokuha sa ilang mga sulat ug parcels sa Post Office human madawat ang notisya apan karon ihatud na kini mismo sa panimalay.  Kompetisyon sa ubang courier ang pihô nga hinungdan niining pagbag-o sa sistema sa Post Office.  Matud pa bitaw sa pagya, “ang magmikâ sa pansitan, hayan mabiya-an”.  Saoonz!