Pamolitika taliwa sa pandemya
Kon nahibung ka pa hangtod karon nganong nagpabiling taas ang mga kaso sa COVID-19 sa Pilipinas, nga karong bag-o nasudlan na og lokal nga mga kaso sa mas mananakod ug mas makamatay nga Delta variant, nga kon manakod sa mas daghan gikahadlokan nga moresulta sa grabeng pag-ulbo sama sa India, Indonesia ug ubang kanasuran, nga kon simbako mahitabo segurong mopaawas sa atong mga ospital, nga kon di kapugngan makaangin sa mas daghang matakdan ug mangamatay, nga kon mahinayon mopasamot sa kalisod sa atong panginabuhi, ang mosunod mahimong mohatag og katin-awan:
* * *
Tingali tungod sa presidente nga imbes motingob sa iyang panahon sa epektibo nga pagduma sa pandemiya pinaagi sa pagbalanse sa pagpanalipod sa kahimsog sa katawhan ug sa pagpabangon sa nasudnong ekonomiya nibuylo na sa pagpangandam para sa piniliay sunod tuig.
Human nipahibawo nga modagan pagka bise presidente, giinsulto ang iyang alyado nga nanaway sa iyang pagsurender sa West Philippine Sea ngadto sa China ug sa pagka-triple sa pangurakot ubos sa iyang pamunoan, ug gipalagpot pa gyod gikan sa partido nga maoy gisakyan sa iyang kandidatura pagka presidente niadtong 2016.
* * *
Tingali tungod sa iyang tigpamaba nga ang inadlawng briefing sa COVID-19 gisaling-itan sa inadlawng pahinumdom nga modagan siya pagka senador kon modagan pagka presidente ang babayeng anak sa presidente kay giingnan na siya sa Ginoo nga nagkinahanglan og senador ang Central Luzon.
Tingali tungod sa mga sakop sa gabinete nga nipapilit sa ilang mga nawong sa mga proyekto sa niaging pamunoan, nangabang og billboards nga niawhag nila pagdagan ug nagpaukyab pagpapas sa bar ug board exams aron mahisgutan ang ngan.
* * *
Tingali tungod sa anak sa presidente nga nibiya sa iyang syudad, nga mao karoy epicenter sa COVID-19 sa Pilipinas kay maoy kinadaghanan og inadlaw’ng kaso sa niaging pila na ka semana, aron pagsuroy sa mga probinsiya, syudad ug lungsod nga kinadaghanan og mga botante paghingpit sa maniobra pagpuli sa iyang amahan aron di maapiki ang ilang pamilya lapas sa 2022.
Tingali tungod sa tinuod untang mga eksperto sa public health nga nitago sa ilang nahibaw-an sa siyensiya ug nipaundayon sa pataka nga mga lagda sa presidente, alyadong mga politiko ug retiradong mga heneral.
* * *
- Latest
