Menteryo de kandado

Kagahapong adlawa ang 2nd death anniversary sa akong inahan ug isip paghandum sa adlaw sa iyang pagtaliwan sa kalibotan miduaw unta ako sa sementeryo Katoliko sa dakbayan sa Lapu-Lapu apan kutob ra gyud sa gate sa sam-ang.

Kini tungod kay nakakandado ang menteryo sa Humayhumay kay dili pasodlan gumikan sa protocol nga gipatuman sa tagdumala.

Napamatod-an nako nga tinuod gyud diay ang gipadangat nga sentimiento sa usa ka OFW nga gustong modagkot sa lubong sa iyang amahan dihang nakahigayon siya pag uli taliwala sa pandemic.

Matud niya nga nakauli siya kay atol pud nga gilubong ang iyang sister-in-law apan gilimitahan lang ang nakasulod samtang ang uban kutob lang gyud sa gawas.

Seguro masabtan nato ang tumong sa nagdumala nga estriktong pagpatuman sa health protocol.

Apan angayan pud seguro tan-awon ang sitwasyon kong dili man daghan ang gipanglubong nianang adlawa mahimo segurong tugotan ang pamilya sa kataposang higayon.

Sa pag-schedule pa lang sa lubong makontrol na nila nga dili magdungan ug dili man pud seguro ingon niana ka daghan ang mohatod kay mga kadugo ra man nga silang tanan nag gikan sa haya o sa balay.

Samtang sa pagdagkot o pagduaw sa lubong kadtong tapos pangadye, 40 ka adlaw ug hubkas lang ang gitugotan apan mo coordinate pa sa simbahan.

Murag nasobrahan naman seguro ka estrikto kay pareha sa sitwasyon sa OFW ug sa akong experience nga gustong motanda sa lubong sa inahan kay death anniversary, tungod sa ka busy na schedule mag tinagsa naman sa pagbisita sa menteryo maong seguradong wala gyuy malapas nga protocol.

Murag maka self-pity ta og ahat nga sa daplin sa karsada atubangan sa gate modagkot og kandila, murag nihapit ka og fiesta sa kapilya nga nakahapit og nanagkot sa gawas.

Murag ang menteryo Katoliko lang sa Lapu-Lapu ra man seguro ang dunay ingon niini ka higpit nga patakaran.

Ang ubang mga dapit bukas ra man kanunay basta maseguro nga mapatuman ang mga health protocols.

Hinuon managlahi man ang patakaran kong maoy nakita nila nga mapanalipdan ang mga tawo sa covid trasmission respetohon nato.

Apan manghinaut lang pud kita nga masabtan nila ang sentimiento sa mga tawo ug bukas ang ilang pagsabot nga bisan mahatagan og gamayng dignidad ang mahal sa kinabuhi nga gihandum nga didto gyud madagkotan og kandila mismo sa lubong dili sa karsada.

Mahimo sad sila mo-assign og tawo nga mapamalihog pagbutang sa buwak og kandila sa lubnganan kay sa sirad-an ang ganghaan sa sam-ang.