Maneguro pagpanalipod sa kahimsog
Lahi sa nangaging mga kaso sa Delta variant (ang labing mananakod ug makamatay sa tanang mutations sa kagaw nga nakaingon sa COVID-19) nga nabantayan ang mga pasyente sa airport ug pantalan, 11 sa 16 ka bag-ong kaso—duha sa Kabisay-an, unom sa Mindanao ug tulo sa Luzon—wa kabiyahe sa ubang kanasuran.
Sa di pa ta maalarma sa kahigayonan nga nagsugod nang lokal nga tinakdanay nga mahimong moresulta sa mas paspas nga pagsulbong sama sa India, Indonesia ug ubang kanasuran, moginhawa unta ta og lawom. Ug kalmang susihon unsa ang atong nahimutangan.
* * *
Unahon natong maayong mga balita:
- Bisan nisaka ang bag-ong mga kaso sa nangagi nga mga semana, wa pay niulbo nga di kasarangan nga tinakdanay sa mga lugar nga nahimutangan sa mga kaso—Western Visayas, Northern Mindanao, Metro Manila ug Central Luzon;
- Wa pay nakitang koneksiyon tali sa lokal nga mga kaso nga maoy timaan sa pagsugod na sa community transmission; ug
- Nangaayo ang mayoriya sa mga nataptan sa Delta variant, nga posibleng tungod kay di grabe ang ilang kahimtang o tungod sa katakos sa mga ospital sa pagtambal nila.
* * *
Isunod natong di maayong mga balita:
- Sa pagpahibawo sa Philippine Genome Center sa 16 ka bag-ong kaso sa Delta variant, wa nay bisan usa nga aktibo—nangaayo na ang 15 ug namatay na ang usa—nagtimaan nga langay ang genome sequencing;
- Ang duha ka pasyente sa Western Visayas nangasakit niadto pang Mayo 27, nagpasabot nga naabtan og 50 ka adlaw—dul-an duha ka buwan—una nahingpit ang genome sequencing sa swab samples; sa ato pa
- May kahigayonan nga nagpadayon nang lokal nga tinakdanay ug makugang na lang ta sa makalilisang nga pagsulbong bisan unsang adlawa gikan karon.
* * *
Ang labing dautang balita maong kalidad sa liderato ni Presidente Rodrigo Duterte sa pagduma sa kapin sa tuig nga pandemiya. Kon paukyab gihapon imbes pagsulbad ang tuyo ug kon pamolitika gihapon imbes siyensiya ang basehan sa mga lagda, manguros na lang tang daan.
Simbako wa pa maleksiyon ug di gihapon magtarung ang mga tagduma sa kampanya batok sa COVID-19, mangunay ta pagpanalipod sa aatong kahimsog. Bisan mas mananakod ug mas makamatay ang Delta variant, epektibong masagang sa panghunaw, pag-face mask, physical distancing ug bakuna.
* * *
- Latest
