Patentero sa disgrasya sa karsada

Mura'g maghilak ang adlaw kong walay madisgrasya sa mga karsada diin apil kanang dapit sa Cebu South Coastal Road sa habig sa dakbayan sa Talisay nga ma-document gyud kay makuhaan og video sa CCTV.

Ka duha sa usa ka semana mabalita gyud sa telebisyon nga naay mga nagkasingki nga mga sakyanan dili lang motorsiklo kon dili apil na sa mga sakyanan nga upat ang ligid.

Ngano man? Sayon ra kaayo ang tubag nga mao ang sobra ka kompiyansa sa mga motorista kay ilabi na kong luag ang karsada magpatoragas lang ang mga sakyanan nga mag apas kanunay sa oras nga gusto gyung apson ang red light, ang resulta disgrasya.

Maayo nalang gani kay walay nagrabehan o nakalas sa mga disgrasya dihang dapita apan nakaangkon gyud og kadaut sa lawas ug sa sakyanan.

Kong magtan-aw ka sa video mora’g walay kahadlok ang mga motorista dihang dapita nga nagtuo nga wala nay lagda sa trapiko ug sayon ra kaayo nga molapas. In fairness, sa mga traffic enforcer sa Talisay City abtik man sila sa pagpatuman sa traffic rules apan sila ra man pud ang bantayan, sympre sa kadaghan sa mga sakyanan ug ka limitado sa ilang mga tawo dili gyud maato.

Hinuon nasakpan man ang uban sama niadtong enforcer nga nakigtakos sa mga nakamotorsiklong snatcher, naa pay usa nga nakigtigi sa usa ka traffic violator nga nagbutang sa kinabuhi nila sa peligro.

Puwera sa mga maayo, naa gyuy uban nga basta makakupot na sa manebela sa motor o awto mora’g mausab man ang paminsar ambot murag mosulod ang espirito sa pagkahambugero nga dili na mahadlok nga makig patentero sa peligro.

Unta ipatigbabaw ang disilpina nga kong mag orange signal na mohunong na kay sa mag apas nga makalabang pa pastilan ka delikado nga mabanggaan o makabangga.

Dili gyud kapangantihan ang pagmaneho kay ang uban nagtoo ng maayong laki sa pagmaneho og sakyanan, tinuod man na basta motuman ka lang sa  balaod sa karsada.

Sa tantong dinali dali delikado ang mga bukog ang mabali busa amping lang gyud ug dili makig patentero sa disgrasya sa karsada.