Pacman mihatag pa’g partida

Sa Pacquiao-Spence Tale of the Tape, si Manny ‘Pacman’ Pacquiao 42 anyos na, may (62 wins, 7 losses, 2 draws, 39 knockouts) nga record sa 71 fights, samtang si Errol Spence Jr. 31 anyos, bata pa ug naa pa gayod sa iyang prime nga pagsidlak, kinsa naghupot og (27 wins, 0 loss, 0 draw, 21 knockouts) nga rekord sa 27 fights.

Sa pamarog, si Pacman, 5 feet 6 inches lang ug dunay 67 inches ang gitas-on nga maabot sa huyad sa iyang kumo. Samtang si Errol, 5 feet 9.5 inches ang height ug 72 inches ang gilay-ong makab-ot sa iyang suntok.

Labihang biyaa ni Manny. Pwerting iniloga ni Errol! Ang mopusta ni Spence og $450 modaog rag $100, samtang ang mopatad ni Pacquiao og $100 makakobrag $350. Pero wala mahadlok si Manny. Gani, gihatagan pa niya si Spence og partida.

Sa wala pa molupad si Manny uban sa iyang team paingon sa Wild Card Gym, Los Angeles, California, nanuntok na siya daan sa nawong sa Malakanyang.

Atubangan sa publiko, siya mipasangil nga ning pagpamunoan ni Presidente Rodrigo Roa Duterte, misamot kuno kagrabe ang korapsiyon. Katulo kuno pilopiloa ikomparar sa panahon ni PNoy Aquino.

Nagtuo si Manny nga dapigan-dayegon siya sa katawhan. Apan sukwahi ang nahitabo. Hasta mga kauban niyang senador nangasuko. Mora kuno siyag presidente sa Pilipinas nga nagmandar sa Senado nga paimbestigahan ang gireklamo niyang korapsiyon samtang atua pa siya sa Amerika.

Lakip na iyang diploma sa kursong AB Politiccal Science sa University of Makati giutingkay sa mga nagpakabanang citizen human mipasiatab nga dili siya ‘tiwali’ ug ‘sinungaling.’ Diin,  nangalisbo hinuon ang lang-og baho nga angay niyang hugasan sa limpiyong pagpamahayag aron mahibalik  iyang kahumot sa mga mausisahong katilingban.

Sa social media, kada adlaw nagpungasi daghang negatibong komentariyo batok ni Manny. Mga hait pulong nga daw gipatugpang mga bug-at suntok ngadto sa iyang nawong.

Mas sakit ang hait pulong kay sa suntok. Ang hait pulong modulot sa kasingkasing. Samtang ang suntok, lawas ray mabun-og. Ning maong kahimtang, daw gihatagan pag partida ni Pacman si Spence.

Dili kaha kini makaapekto sa nagsingabot nilang away? Ato ning masayran inig ka Agosto 21.