3rd wave

Kini ang paghulagway sa Department of Health-7 sa nasinati nga pagsaka na usab sa kaso sa COVID-19 sa Central Visayas nga nakamugna og managlahing reaksIyon sa mga tawo.

Gani nakakuha kini og pagtagad bisan sa national media kay lagi catchy man kaayo ang description nga third wave nga murag hilabihan naman gyud kaayo ka grabe ang sitwasyon sa COVID-19 sa rehiyon.

Niadtong nakalabay’ng adlaw nahinabi nako si Dr. Eugenia Mercedes Cañal, cluster head sa RESU 7, ug siya mihulagway nga third wave na ang nasinati nga pagtaas sa COVID-19 sa Central Visayas.

Mihatag siya og pagpasabot nga ang termino nga iyang gigamit usa lang ka paghulagway sa porma nga susama sa usa ka bawod ang movement sa kaso sa COVID-19 ug wala kini magpasabot nga ingon na niana ka grabe ang sitwasyon.

Giklaro niya nga wala siyay tumong sa pagpapanghadlok sa mga tawo o makamugna og panic kay purely pagpanag-ing lang ang termino nga iyang gigamit kay duna may pagsaka gayud sa mga kaso.

Gidugang niya nga wala pa may angayan nga kahadlokan kay bisan og nisaka ang kaso sa COVID-19 sa rehiyon, luag pa man kaayo ang utilization rate sa mga health care facility, ilabi na sa Sugbo nga naa pa gani sa 30% nga level.

Bisan dunay taas nga kaso sa mga probinsya sa Negros Oriental ug Bohol apan lahi ang sitwasyon sa Sugbo nga dunay igong katakos ang pasilidad sa pag atiman sa COVID patients.

Nasabtan nako ang punto sa DOH COVID-19 spokesperson nga daw yanong paghulagway ang iyang gihimo apan dili pud nato mabasol ang uban nga sobrang naka reak sa “3rd wave’ nga pulong tungod kay mabutang man gyud dayon sa hunahuna sa uban nga pastilan ingon niana na ka grabe ang kaso sa Central Visayas.

Gani nakakuha man gani sa pagtagad sa national media ug na-banner story pa sa ubang pamantalaan ang “3rd wave” nga morag makapaalarma nga posibleng mamahimong hanig sa uban nga mopatuman dayon og mas estriktong quarantine status.

Posibleng gamiton kini sa IATF nga justification nga sakto gyud sila sa gipatuman nga pagpatuman sa protocol nunot sa issue niini sa provincial government sa Sugbo diin bag-o lang silang nakig-meeting sa mga sakop sa Provincial Board.

Dili man ako experto apan kong itandi nato sa NCR ug bisan sa ubang rehiyon nga dagko kaayo ang numero nga magpositibo kada adlaw murag wala man sila mohulagway nga usa ka “wave” o ikapila na ka “wave” ang nahitabo kanila.

In fairness sa Sugbo, ilabi na sa dakbayan, naay pagsaka apan gamay ra intandi sa ubang mga LGU maong dili ta makabasol nga mobati og kadismaya ang mga local officials kay namintenar man ang mga pamaagi nga dili gyud mograbe ilabi na ang sitwasyon sa mga health care facility.

Aron makalikay nga makamugna og panic, gamit nalang seguro og pulong nga dili bombastic sama sa surge ug spike bisan og pareha ra ang buot ipasabot. Kong sa tinagalog pa mogamit og mas haum nga choice of word.

Hinuon sila man ang experto busa sa kalibotan nila mao kini ang insakto. Apan alang kanatong tanan, mosunod kita sa mga gipatuman nga protocol aron malikayan ang dakong epekto sa pagtaas sa kaso sa COVID-19 mintras makaya pa ug kayahon gyud alang sa atong kaluwasan.