Bodycams obligahin sa pulis, sundalo, PDEA
VIDEO cameras sa dibdib at dashboards. Mahahalagang kagamitan ‘yan ng pulis. Kasing basic ng tsapa, batuta, baril, posas, pen, notebook, at Miranda Rights at Anti-Torture cards. Solidong ebidensiya sa korte ang video footages. Pruweba pa ng pag-abuso sa sibilyan, o ng maling akusasyon sa pulis ng pag-abuso. Sa pagrepaso ng recordings, malilinang ng superiors ang kasanayan at maitutuwid ang mga mali ng tauhan. Mapapahusay ang performance.
Nakatakda sa Philippine National Police Operational Procedures Manual ang mga alituntunin. Saad sa Rule 1 na dapat sila magsilbi at magprotekta ng mamamayan, at respetuhin ang karapatang pantao at dignidad ng suspects. Detalyado kung paano sumuporta sa kontra-terorismo, mag-aresto, magkumpiska, magligtas, magpapayapa ng riot, at mag-imbestiga ng krimen. Sa lahat ng ‘yon naka-uniporme dapat ang pulis at bitbit ang mga kagamitan. Kasama ru’n ang videocams. Sa undercover operations lang exempted ang body-cams at dash-cams.
Kung may videocams wala na sanang kontrobersiya sa libong pinatay sa anti-drug operations, sa raids sa mga bahay ng pinaghihinalaang rebeldeng komunista, at sa mga maling enkuwentro ng mga alagad ng batas. Kaya obligahin dapat ito sa pulis, sundalo, National Bureau of Investigation, at Philippine Drug Enforcement Agency, ani Senate President Pro Tempore Ralph Recto.
Nung 2017 isinulong nina Recto at noo’y-Senador JV Ejercito ang P5.4-bilyong pondo para sa mga bagong kagamitan ng pulis, kasama ang body-cams. Pero makalipas lang ang apat na taon at limang PNP chief nakabili ng 2,600 piraso nu’ng Enero 2021. Naantala ang pagbili dahil sa sablay na biddings. Kung 2,600 ang mabibiling body-cams kada taon, aabot nang 100 taon para mabigyan ang bawa’t pulis, iling ni Recto. At 20 taon kung isa sa bawa’t lima lang ang magsusuot ng body-cam sa anumang oras. Pero mura lang ang gadget na ito.
- Latest