Sayawan, kantahan magno-normal sana
MAY mga aktibidad na kailangan ang pagtitipun-tipon: sayawan, kantahan, dula, at sports. Malaking tulong ang audio-video conferencing para makasali maski malayo sa aksiyon. Pero iba pa rin kapag naroon mismo sa ballroom o disco, sa concert hall o music bar, sa teatro o sports stadium. Ang sarap umindak sa live music kasama ang marami, maski sa plaza lang ng baryo. Iba ang pakiramdam na mapanood nang aktuwal ang idolong musikero, o mag-videoke nang tabi-tabi. Mas tagos ang tama ng dula kaysa sine o telebisyon. At kailangan naroon ka mismo sa court o field para sa team basketball, football, o volleyball.
Hindi lang naman sex ng nag-iibigan ang tumatanim sa memorya. Marami pang ibang eksena: pangangaral ng magulang o guro, kainan at tunggaan ng barkada, dasalan sa simbahan, trabaho at biyahe. Pati dalamhati at sakuna ay naaalala. Lalo na kung maraming estranghero sa tabi – sa dance floor, sa music concert, sa entablado, at stadium. Sa pagdidikit-dikit ng mga magkakaibigan at estranghero, maligaya na.
Hay! Masyadong matagal nang natengga ang marami sa isolation.
Maski bakunahan ang 70% ng tao para magka-herd immunity, dapat pa ring mag-ingat sa COVID-19, anang mga doktor. Ituloy ang pag-face mask at shield, safe distancing, at malimit na paghugas ng kamay. Kaya wala pa rin malalaking umpukan. Sa restoran layu-layo at lihis ang pag-upo. Sa opisina, pabrika, eskuwela, simbahan, bus at tren, panatilihin daw ang anti-infection protocols. Sa hudyat lang daw ng mga eksperto pa lang tayo maari bumalik sa dati.
Kailan ‘yon? At kung dumating ang oras, nariyan pa kaya ang mang-aawit, ang aktor at aktres, at atleta. Baka naman sa tagal nilang nabakante ay nag-saka na lang o nagtinda ng kakanin o nagretiro. At ang mga balakang natin, pupuwede pa ba mag-swing, boogie at tango?
* * *
Makinig sa Sapol, Sabado, 8-10 ng umaga, DWIZ (882-AM).
- Latest