Quiboloy vs Pacquiao

Hugaw ang politika sa Pilipinas. Ultimo mga dagkong lider sa simbahan, masunog ang gisul-ob nilang pagkabalaan sa higayong moapil pagsawsaw sa nagdilaab nga kalayo sa politika.

Si Senador Manny Pacquiao, kinsa pastor usab, nanudlo unsay iyang nakat-onan sa pagpunay’g basa’g bibliya. Apan dihang napiksan ang kasingkasing sa iyang dakong ambisyon nga gustong mag-presidente sa Pilipinas, ultimo higala niyang si Presidente Rodrigo Duterte, iya nang gikontra-saway.

Matod niya, ang korapsiyon ning panahon ni Tatay Digong, katulo kuno pilopiloon ikumparar sa miaging administrasiyon. Minilyong Diehard Duterte Supporters ang gisakitan sa maong gipabutong pasangil ni Manny. Lakip si Pastor Apollo C. Quiboloy sa Kingdom of Jesus Christ, kinsa nasayod nga miubos ang korapsiyon sa pagpangulo ni Duterte, natandog-mireak.

Gisukna si Pacquiao kon giunsa pagkuha sa Senador ang four-year course nga Bachelor of Arts in Political Science-Local Government Administration sa University of Makati sulod lang sa tulo ka bulan? Dili ba ang maong buhat, korapsiyon usab?

Hinuon, gitubag kini ni Manny.  Nga gieskuylahan kuno niya kinig 11 ka tuig, diin didto siya magsugod sa Notre Dame of Dadiangas niadtong 2008. Human mag-first year college mibalhin siya’g informal education kay aktibo man siya pirme sa boksing. Maong 2019 na siya nakagraduwar sa University of Makati.

Pero kahinumdoman, nga base sa mga balitang nanggawas sa tuig 2019, si Manny migraduwar sa college, pinaagi sa Expanded Tertiary Education Equivalency and Accreditation Program, usa ka alternative education program sa CHED.

Busa, nakasala ba si Quiboloy sa pagpangutana, giunsa pagkuha ni Pacquiao iyang diploma? Wala man si Manny husgahi. Pero, giunsa niya pagsabot-tubag?

Ania: “Yong nanghuhusga diyan, especially belong to the church, for your information, nagtuturo ka pa na man sa salita ng Panginoon, tapos, nanghuhusga ka na.

Ay, hindi yan! Ni si Jesus hindi nga nanghuhusga ng tao, eh! Kahit may kasalanan ang tao hindi nanghuhusga, hindi nagbabatikos…”

Daw iya hinuong gi-seminar ang pastor sa Kingdom of Christ. Pastilan, Manny, hain na ba ang giingon sa Ginoo: “Kon labayon kag bato, baslig pan?

Intawon, ayaw gub-a ang matahom mong imahe tungod lang sa politika. Dili ba, bisag giunsag kastigo-patay si Hesus sa mga Hudeyo, gugma’g kaluoy gihapon Iyang gibawos? Practice what you preached!