Balik na sad ta sa uno ani?

Human sa taastaas nga panahon inanay na kitang nakaginhawa gikan sa bug-at nga epekto mugna sa pandemic diin namintinar sa Sugbo ang General Community Quarantine status nga nakapalik sa normal nga panginabuhi ug bisan gani sa lihok sa mga tawo.

Labaw sa tanan murag nawala na ang kakulba sa katawhan sa epekto sa COVID-19 kay kinsa nakabangon na, dili man sa hingpit apan sa hinay hinay nakapadayon na sa pagpanikaysikay.

Apan murag nasobrahan na ka kompiyansa ang mga tawo nga makita nato karon nga susama naman kaniadto ang mga lihok, ang nakadeperensya lang mao ang gipangsul-ob nga face mask nga usahay ibutang sa suwang, talagsa nalang usab ang nagsul-ob og face shield.

Tungod niini dili ikahibulong nga misaka na usab ang kaso sa COVID-19 sa dakbayan, ngano man? Ang tubag makita nato kong motan-aw kita sa atong palibot naay mga tawo gani nga maglaroy laroy sa mga karsada kay magpangayo.

Magdala pa og mga bata nga kugoson aron maluoy ang mga tawo,makapangutana ako usahay unsa man wala ni silay labot sa protocol?

Sa akong nahinumduman higpit nga gidid-an pa ang mga bata nga mogawas apan tan-awa sa pipila ka mga dapit naay mga bata nga wala magsul-ob ug mask kinsa magdagandagan nga dako kaayo ang potential nga mamahimong super spreader.

Ang mga business establisments, bisan sa kakunay nga pahimangno sa mga otoridad naa gyud gihapoy magpabadlong diin common violation ang social distancing.

Kong dili kini maaksyonan dili layo ang posibilidad nga mahisama ang sitwasyon karon sa sitwasyon kaniadto dihang nangitlog ug nagpasanay ang virus dinhi sa Sugbo particular na sa Cebu City.

Sa talaan sa EOC mokapin  sa 700 ang aktibong kaso ug inanay nga nagsaka, samtang ang occupancy sa mga health care facility inanay usab nga napon-an sa mga pasyente sa COVID-19.

Gani ang COVID-19 positivity rate sa Cebu City miabot sa 8.32 porsiento nga mas taas sa 5% nga threshold sa World Health Organization busa gikinahanglan nga dalion kini sa pag aksyon pinaagi sa pagpahinumdum sa mga tawo nga malimtanon.

Dili na nato tugotan nga mabalik sa kanhiay’ng panahon dihang nagterorismo ang virus sa Sugbo. Mahimo man nga padayon ang mga kalihokan basta dili lang moluag ang mga tawo sa pagpanalipod sa kaugalin sa ingon mapanalipdan usab ang mga tawo nga naglibot kanato.

Isig bantay nalang ang matag usa kanaho aron magpabilin nga ma enjoy nato ang peace of mind nga naa nato karon, dili na kita mobalik sa estado sa kahadlok kong magtinabangay ang tanan.