Way puangod

Sa taho ni Hazel Mascardo niining maong pamantalaan, giingon nga gipangita na sa mga sakop sa National Bureau of Investigation (NBI) ang inahan nga mipasuyop og shabu sa iyang dos anyos nga anak panahon nga magsamok kini sa iyang pag-atiman sa iyang mga parokyano sa iyang balay nga iyang gihimong suyopanan.

Ang way puangod nga inahan misibat human gironda ang iyang panimalay nga gihimong suyopanan ug gibiyaan ang dos anyos niyang anak.

Ang ahente sa NBI nga si Aga Gierran miingon nga makaalarma ang gihimo sa inahan nga matud pa sa mga silingan mopasuyop og shabu sa dos anyos niining anak matag panahon nga kini mohilak. Ang bata dili na matulog ug sabog.

Giingon nga ang mga inahan, inahan sa kanunay’ng panabang, apan kining inahan nga mipasuyop og shabu sa iyang dos anyos nga anak talagsaon. Inahan siya sa kabuang, panuway, way puangod ug walay hinungdan.

Iya na gayod sa inahan ang pagpanalipod sa iyang anak ilabi na gayod sa hulga sa kinabuhi niini ug kadaut. Iya na sa inahan ang paghatag og maayong kinabuhi sa iyang anak bisan pa man sa kapait sa kinabuhi. Iya na sa inahan ang makanunayon nga paggiya sa iyang anak ngadto sa dalan sa katarong. Apan kining maong inahan sukwahi ug wala mahasubay sa naandan.

Kadaghan na ta makadungog nga gigamit ang mga batanon sa pagpamaligya og ginadiling drugas sa pipila ka mga ginikanan nga hanggaw apan karon pa kita makadungog nga dos anyos nga bata gipasuyop og shabu sa iyang inahan matag higayon nga kini mohilak.

Manghinaut lang ko nga nag-inusara lamang kining kasoha ug wala nay laing inahan nga naghimo niini  ngadto sa iyang anak.

Labing seguro ang kawad-on na usab ang pasanginlan sa inahan nganong nakahimo siya sa ingon. Apan kining maong rason dili gayod maka-justify sa iyang gihimo.