Close, open, close

Apas sumpay kini sa akong nakalabay’ng mga lindog mahitungod sa sitwasyon sa pagpamakuna batok sa coronavirus nga dako pa gyud kaayo ang latason ayha makab-ot ang herd immunity.

Pinisik ra gyud intawon sa mga bakuna ang naangkon sa mga dapit nga gawas sa National Capital Region sama sa mga LGU sa Sugbo.

Dako intawon kaayo kita og biya sa mga counterpart nato didto sa kaulohan. Bisan butangan pa og seguro og tapiraw ang lubot sa Cebu LGUs dili gyud kaapas sa kapaspas na sa pagpamakuna didto sa kaulohan sama sa Quezon City nga aduna nay dul-an sa tunga sa milyon ang nabakunahan. Ingon usab niini ang ubang dapit sa NCR.

Sa dakbayan sa Sugbo wala pa gani kaabot og 20% ang nabakunahan lakip na ang ubang mga LGU sa lalawigan ug bisan na sa ubang mga dapit sa nagkadaiyang rehiyon nga gawas sa NCR.

Unsa man diay ang NCR ra ang sakop sa Pilipinas? moingon ang mga opisyal ug ubang mga health expert nga ang NCR maoy nakasianti kaniadto og daghang kaso sa covid maong gihatagan og masdaghang bakuna.

Apan hibaw-i nga usa ka higayon niana nahimong epicenter ang dakbayan sa Sugbo sa COVID-19 nganong wala man kini butangi og daghang supply sa bakuna? Dili ko moingon nga naay pinalabi kay tataw kaayo nga mas gihatagan og mas daghan nga supply sa vaccine ang imperial Manila.

Gani wala man seguro nakasinati og pagsira ang mga vaccination sites didto kay wala man sila mahutdi og supply.

Apan diri sa atoa ilabi na sa Cebu City nakasinati gyud og “close, open, close” nga sitwasyon kay moabalik kong naay supply apan mosirado kay nahutdan ug moabli na pud kay nahatagan og supply.

Sa kadaghan sa populasyon sa katawhan sa Cebu City gigahinan lang kini og gamay’ng supply sama niadtong nakalabay’ng semana nga nakabahin lang og 5,000 doses sa Sinovac vaccine. Aw, gitilapan ra kini sa usa ka adlaw hurot dayon.

Sa atoa sa Sugbo, dili na gyud problema ang pagkumbinser sa mga tawo nga magpabakuna kay modagsa naman ngadto sa vaccination sites. Ang problema karon ang kakuwang o kawalay supply sa bakuna.

Kong napabahaan og supply ang mga dapit sa NCR kaniadto, karon ang ubang rehiyon na sad ilabi na nga nidaghan na usab ang kaso sa COVID-19.

Kay nakabakuna naman sila og dul-an sa tunga sa milyon sama sa Quezon City, pwede balihon na sad ang majority sa vaccine supply sa mga rehiyon na sad gawas sa NCR aron makaapas pud sa target nga herd immunity.

Kong dunay abunda nga vaccine supply dili na gyud ma-close ang mga vax sites ug mapadayon na ang vaccine rollout alang sa pagkab-ot sa hiniusang tinguha nga mapanalipdan ang tanan batok sa virus.