Estrikto sa media

Nakalitan ang katawhang Pilipinhon dihang gipahibalo nga namatay si kanhi presidente Noynoy Aquino. Samtang daghan ang gianug’nan sa iyang pagpanaw sa laing kalibotan, may uban sab nga mihimo’g bugalbugal.

Sigun sa report nga si Noynoy namatay tungod sa “renal failure” gumikan sa gihambin niya nga diabetes. Sa ato pa, wa na kaayo motrabaho ang iyang kidney. Apan dunay mi-post sa social media nga si Noynoy kuno namatay sa HIV, pastilan.

* * *

Daghang nidayeg ni Noynoy. Bisan ako nakadayeg kay si Noynoy kaniadto, nakig-indig gyud sa mga yano nga katawhan nga magsakripisyo sa grabeng traffic, ug gibadlong niya ang migamit og siren sa ilang mga sakyanan.

Nindot ang iyang gihimo, ilabi na ang wa gyud pagkalambigit og pagpangawkaw sa kwarta sa kagamhanan, apan ang iyang administrasyon wa gyud mahimong limpyo sa pangurakot sa pipila ka kawani.

Ang wa lang gyud nako magustohi kang Noynoy mao nga, sama sa iyang inahan nga nahimo usab nga presidente, pwerteng estriktoha sa ilang mga PSG nga nagbantay. Atol sa termino ni kanhi presidente Gloria Arroyo, lugak ra kaayo ang PSG kon moanhi si Gloria sa Sugbo.

Sa ato pa, nag-agad ra gyud ni sa mando sa ilang pangulo. Unsay ilang gikahadlokan nga duolon bisan sa media? Sayonan ka nga kaming media, ikordon ug bantayan nga dili makaduol sa presidente?

* * *

Apan ang wa gyud mauyoni sa daghang katawhan, apil na gani tingali ka nga nagbasa karon, mao ang pagpatuman ni kanhi presidente Noynoy sa K-12.

Nadala siya sa hulhog niadtong Armin Luistro nga maoy iyang DEPED secretary nga dugangan og duha ka tuig ang education program sa nasud.

Ang rason ni Luistro, nga gisagop usab ni Noynoy, mao nga alkanse kuno ang mga Filipino kon mangaplay og trabaho sa laing kanasuran kay K-12 na kuno ang education program sa ilang mga nasud, unya kita kuwang og duha ka tuig.

Kay ngano, ang tanang tinun-an molangyaw ba gyud sa laing kanasuran aron sa pagpangita’g trabaho? Nganong giratsada man nila nga ang tanan gyud ang mokuha og K-12?

Para kanako ang nindot unta mao nga papilion ang mga ginikanan ug mga tinun-an kon gusto ba sila og K-12 ug ang naandan ra ba nga sistema sa edukasyon.

Pasabton ang mga ginikanan ug mga tinun-an nga kon may plano sila nga mo-abroad, kinahanglan sila og K-12, kon wa sila’y plano nga mo-abroad, pwede ra nga dili sila mokuha niini.

Resulta, pwerteng daghana sa mga tinun-an nga imbes college na unta, kutob ra sila sa high school. Mao ni nga dunay mga tawo nga wa malipay ni Noynoy.